ریاستی اداروں اور ایک خاتون صوبائی وزیر کے خلاف مبینہ طور پر سوشل میڈیا کے غلط استعمال کے مقدمات میں گرفتار پاکستان تحریک انصاف (پی ٹی آئی) کی سرگرم کارکن فلک جاوید کو عدالت نے جوڈیشل ریمانڈ پر جیل بھیج دیا۔رپورٹس کے مطابق نیشنل سائبر کرائم انویسٹی گیشن ایجنسی (این سی سی آئی اے) نے فلک جاوید کا جسمانی ریمانڈ مکمل ہونے پر انہیں جوڈیشل مجسٹریٹ نعیم وٹو کے روبرو پیش کیا۔ عدالتی کارروائی کے دوران مجسٹریٹ نے کیس کے ریکارڈ کا بغور جائزہ لینے کے بعد 14 روزہ جوڈیشل ریمانڈ کا حکم صادر کرتے ہوئے فلک جاوید کو جیل منتقل کرنے کی ہدایت کی۔ دوسری جانب، انسدادِ دہشت گردی کی عدالت نے پولیس کو اجازت دی ہے کہ وہ زمان پارک کے باہر ہونے والے حملوں اور توڑ پھوڑ کے مقدمے میں فلک جاوید سے جیل میں تفتیش کرسکے۔ یہ مقدمہ ریس کورس پولیس اسٹیشن میں درج کیا گیا تھا۔ عدالت نے پولیس کی درخواست منظور کرتے ہوئے حکم دیا کہ تفتیشی افسر جیل کے احاطے میں ہی تمام تحقیقات مکمل کرے تاکہ قانونی تقاضے پورے ہوں۔ ذرائع کے مطابق، این سی سی آئی اے نے فلک جاوید کو اسلام آباد سے گرفتار کیا تھا، جبکہ ان کی بہن صنم جاوید کو حال ہی میں خیبر پختونخوا سے گرفتار کر کے لاہور کی کوٹ لکھپت جیل منتقل کیا گیا، جہاں وہ 9 مئی 2023 کے واقعے شادمان تھانے پر حملے کے مقدمے میں 5 سال قید کی سزا بھگت رہی ہیں۔
پی ٹی آئی کی کارکن فلک جاوید 14 روزہ جوڈیشل ریمانڈ پر جیل منتقل
Discussion about this post