اوورسیز پاکستانیوں کے لیے ’ڈیجیٹل والٹ‘ کا آغاز

چیئرمین پرائم منسٹر یوتھ پروگرام رانا مشہود احمد خان نے کہا ہے کہ حکومتِ پاکستان نے ڈیجیٹل معیشت کے فروغ کے لیے ایک انقلابی قدم اٹھاتے ہوئے اوورسیز پاکستانیوں کے لیے ڈیجیٹل والٹ کا اجرا کر دیا ہے۔ انہوں نے بتایا کہ یہ جدید نظام بیرونِ ملک مقیم پاکستانیوں کو اپنی رقوم قانونی اور محفوظ طریقے سے وطن منتقل کرنے کا موقع فراہم کرے گا۔
ڈیجیٹل والٹ کے ذریعے 10 لاکھ ڈالر تک کی رقم بآسانی اور شفاف انداز میں بھیجی جا سکے گی ,  یہ اقدام نہ صرف مالی شفافیت کو فروغ دے گا بلکہ غیر قانونی زرِ منتقلی کے ذرائع کے خاتمے میں بھی مددگار ثابت ہوگا۔ اسٹینفورڈ یونیورسٹی پروگرام کی لانچنگ تقریب سے خطاب کرتے ہوئے رانا مشہود احمد نے کہا کہ خلیجی ممالک میں موجود پاکستانیوں کو اکثر بینک اکاؤنٹس کھولنے میں مشکلات کا سامنا رہتا ہے۔ اسی لیے حکومت نے یو بی ایل، وزارتِ خزانہ اور دیگر اداروں کے ساتھ شراکت میں ایک جامع معاہدے کو حتمی شکل دے دی ہے۔ اس منصوبے کے تحت بیرون ملک مقیم پاکستانیوں کو ایک ڈیجیٹل والٹ فراہم کیا جائے گا   جس کے ذریعے وہ اپنی محنت کی کمائی براہِ راست پاکستان منتقل کر سکیں گے۔

رانا مشہود کے مطابق، اس اقدام سے ہر ماہ ایک ارب ڈالر قانونی ذرائع سے پاکستان آئیں گے، جو ملکی معیشت کے لیے ایک بڑی پیش رفت قرار دی جا رہی ہے۔انہوں نے مزید کہا کہ اوورسیز پاکستانی ہمارے قومی تشخص کے سفیر ہیں، جو دنیا بھر میں پاکستان کا مثبت اور روشن چہرہ پیش کرتے ہیں۔ “ہمارے نوجوان ملک کا قیمتی اثاثہ ہیں، ان کے روشن مستقبل کے لیے حکومت پُرعزم ہے۔ جلد ہی نوجوانوں کی فلاح و بہبود کے لیے نئے پروگرامز متعارف کرائے جائیں گے، تاکہ وہ پاکستان کے ڈیجیٹل اور معاشی مستقبل کی تشکیل میں مرکزی کردار ادا کر سکیں۔” رانا مشہود احمد خان کا یہ بیان واضح کرتا ہے کہ پاکستان اب ڈیجیٹل انقلابی دور میں داخل ہو رہا ہے  جہاں جدید ٹیکنالوجی، شفافیت اور نوجوانوں کی شمولیت مل کر معیشت کو نئی سمت دیں گے۔