کراچی میں بھارتی خفیہ ایجنسی ’را‘ کا بڑا نیٹ ورک بے نقاب

کراچی میں ایک ہنگامی پریس کانفرنس کرتے ہوئے ایڈیشنل آئی جی سی ٹی ڈی سندھ آزاد خان نے انکشاف کیا ہے کہ پاکستان کے تفتیشی اداروں نے بھارتی خفیہ ایجنسی ’را‘ کے ایک بڑے نیٹ ورک کو بے نقاب کر دیا ہے، جبکہ دہشت گردوں کے سیف ہاؤس کی بھی نشاندہی ہوئی ہے۔ ایڈیشنل آئی جی کے مطابق یہ پیش رفت اس وقت سامنے آئی جب 18 مئی 2025 کو ضلع بدین کے علاقے ماتلی میں ایک 45 سالہ سماجی شخصیت کے قتل کی تحقیقات کی گئیں۔ واقعے کی سی سی ٹی وی فوٹیج اور عینی شاہدین کے بیانات کی روشنی میں تین ملزمان کی نشاندہی ہوئی، جن میں سے دو کو گرفتار کر لیا گیا۔ ان کے قبضے سے اسلحہ اور موٹر سائیکل بھی برآمد کر لی گئی۔ تحقیقات کے دوران یہ انکشاف ہوا کہ قتل کی منصوبہ بندی بھارتی ایجنٹ سنجے سنجیو کمار عرف ’فوجی‘ نے کی، جو ایک خلیجی ریاست میں مقیم ہے۔ اس ایجنٹ نے پاکستان کے شیخوپورہ کے رہائشی سلمان سمیت دیگر ملزمان کو ہائر کیا اور اس واردات کے لیے خطیر رقم فراہم کی۔

ایڈیشنل آئی جی کے مطابق یہ کارروائی سنجے نے بیرون ملک سے براہِ راست ہینڈل کی۔ آزاد خان نے مزید بتایا کہ ملزمان نے قتل سے پہلے پانچ دن تک ماتلی میں ریکی کی اور یہ پورا نیٹ ورک براہِ راست ’را‘ کے ساتھ رابطے میں تھا۔ ان کا کہنا تھا کہ بھارتی خفیہ ایجنسی نہ صرف دہشت گردوں بلکہ علیحدگی پسند تنظیموں کو بھی ہتھیار کے طور پر استعمال کر رہی ہے۔انہوں نے کہا:

“اس قسم کی کارروائیاں دراصل اسٹیٹ اسپانسرڈ ٹیررازم ہیں۔ پاکستان اس معاملے کو ہر عالمی فورم پر اٹھائے گا۔”

ایڈیشنل آئی جی کے مطابق گرفتار ملزمان سے مزید تفتیش جاری ہے اور آئندہ دنوں میں مزید گرفتاریاں متوقع ہیں۔ ان کا کہنا تھا کہ قابلِ افسوس امر یہ ہے کہ اس قتل کی کارروائی پر بھارتی میڈیا نے کھلے عام جشن بھی منایا، جو اس نیٹ ورک کی حقیقت کو مزید عیاں کرتا ہے۔