فیلڈ مارشل سید عاصم منیر کا تربت کا تاریخی دورہ

بلوچستان کے دل تربت میں ایک نئی تاریخ رقم ہوئی، جب پاک فوج کے سپہ سالار، فیلڈ مارشل سید عاصم منیر، نشانِ امتیاز (ملٹری)، ہلالِ جرأت، نے اپنے عزم و بصیرت سے لبریز دورے کے ذریعے خطے میں امید اور استحکام کی نئی شمع روشن کی۔ پاک فوج کے شعبہ تعلقات عامہ (آئی ایس پی آر) کے مطابق فیلڈ مارشل کو سیکیورٹی کی مجموعی صورتحال، فتنۂ ہندوستان کے خلاف کامیاب آپریشنز، اور جاری ترقیاتی منصوبوں پر تفصیلی بریفنگ دی گئی۔ اس موقع پر وزیر اعلیٰ بلوچستان سرفراز بگٹی، چیف سیکریٹری اور اعلیٰ سول و عسکری حکام بھی موجود تھے۔ آرمی چیف نے سول انتظامیہ کے ساتھ ملاقات میں واضح پیغام دیا کہ بلوچستان کی تقدیر بہتر طرزِ حکمرانی، عوامی شمولیت اور شفاف ترقی سے وابستہ ہے۔ انہوں نے کہا کہ امن اور خوشحالی کا راستہ تبھی کھلے گا جب سول و عسکری ادارے ایک دوسرے کے شانہ بشانہ چلیں گے۔

جوانوں سے خطاب کرتے ہوئے فیلڈ مارشل سید عاصم منیر نے ان کے ناقابلِ شکست عزم، بلند حوصلے اور آپریشنل تیاریوں کو خراجِ تحسین پیش کیا۔ انہوں نے کہا کہ انہی جانثاروں کی بدولت پاکستان کے دشمنوں کی ہر سازش خاک میں مل رہی ہے اور وطنِ عزیز میں امن و استحکام کا پرچم بلند ہے۔ اس موقع پر انہوں نے اعلان کیا کہ پاک فوج بلوچستان کے عوام کی خوشحالی اور پائیدار ترقی کے لیے ہر محاذ پر اپنا کردار ادا کرتی رہے گی۔ انہوں نے باور کرایا کہ عوامی مسائل کا حل اور خطے کی ترقی، سول اور عسکری اداروں کے باہمی تعاون کے بغیر ممکن نہیں۔ قبل ازیں تربت آمد پر کور کمانڈر بلوچستان نے فیلڈ مارشل سید عاصم منیر کا پرتپاک استقبال کیا۔ یہ دورہ اس بات کی روشن علامت ہے کہ پاک فوج بلوچستان کے عوام کے ساتھ ہے، ان کے دکھ درد میں شریک ہے اور ان کے مستقبل کو روشن بنانے کے لیے پُرعزم ہے۔ فیلڈ مارشل سید عاصم منیر کا یہ پیغام آج ہر پاکستانی کے دل میں گونج رہا ہے کہ بلوچستان کی خوشحالی ہی پاکستان کی ترقی ہے، اور پاک فوج اس منزل کے حصول تک چین سے نہیں بیٹھے گی۔