SCO اجلاس میں بھارت کی سبکی: راج ناتھ سنگھ نے اعلامیے پر دستخط سے انکار کر دیا

چین کے دارالحکومت بیجنگ میں شنگھائی تعاون تنظیم (SCO) کے وزرائے دفاع کا اہم اجلاس ہوا، جس میں خطے کی سیکیورٹی، دہشتگردی کے خلاف تعاون، اور باہمی دفاعی حکمت عملیوں پر غور کیا گیا۔ اس اعلیٰ سطحی اجلاس میں چین، روس، پاکستان، ازبکستان، قازقستان، کرغزستان، تاجکستان اور بھارت کے وزرائے دفاع نے شرکت کی۔ تاہم اجلاس کا اختتام اس وقت تنازعے کا شکار ہوگیا جب بھارتی وزیر دفاع راج ناتھ سنگھ نے مشترکہ اعلامیے پر دستخط کرنے سے انکار کر دیا۔ بھارتی میڈیا کے مطابق ان کی ناراضی کی بنیادی وجہ یہ تھی کہ اعلامیے میں مقبوضہ کشمیر کے علاقے پہلگام میں ہونے والے واقعے کا کوئی تذکرہ نہیں کیا گیا، جسے نئی دہلی نے "دانستہ نظرانداز” قرار دیا۔ بھارتی وفد نے اجلاس کے دوران اپنی "شدید تشویش” کا اظہار کیا، لیکن دیگر رکن ممالک نے اعلامیے کے متن میں کسی قسم کی تبدیلی کو مسترد کر دیا۔ دوسری جانب، اعلامیے میں بلوچستان میں بھارت کے مبینہ کردار کی جھلک بھی دیکھی گئی، جس نے بھارتی وفد کی پریشانی میں مزید اضافہ کر دیا۔ راج ناتھ سنگھ کی جانب سے اعلامیے پر دستخط سے انکار نے نہ صرف بھارت کی سفارتی تنہائی کو نمایاں کیا بلکہ SCO جیسے کثیرالملکی فورم پر اس کے اثر و رسوخ پر بھی سوالات اٹھا دیے۔