پاکستان کی بھارتی پروازوں کیلئے فضائی حدودکی بندش میں مزید توسیع

پاک بھارت کشیدگی کے تناظر میں پاکستان نے بھارتی طیاروں کے لیے اپنی فضائی حدود کی بندش میں ایک بار پھر توسیع کا فیصلہ کر لیا ہے۔ ایوی ایشن ذرائع کے مطابق، اس فیصلے کے تحت نوٹم (NOTAM) آج جاری کیا جائے گا، جس کے بعد بندش کا اطلاق آئندہ ایک ماہ تک جاری رہے گا۔ یہ فیصلہ ابتدائی طور پر 24 اپریل کو کیا گیا تھا، جب پاکستان نے بھارتی طیاروں کے لیے فضائی راستے بند کر دیے تھے۔ بعد ازاں 23مئی کو اس بندش میں ایک ماہ کی توسیع کی گئی تھی، جو آج 23 جون کو ختم ہو رہی تھی۔ اب اس میں مزید توسیع کر دی گئی ہے۔

فضائی ماہرین کے مطابق، اس بندش کے باعث بھارت کی ایئرلائنز کو یومیہ لاکھوں ڈالر کے اضافی اخراجات کا سامنا ہے۔ فی الحال 100 سے زائد بھارتی پروازیں روزانہ پاکستانی فضائی حدود استعمال کرتی ہیں، جنہیں اب متبادل اور طویل راستے اختیار کرنا ہوں گے۔ دوسری جانب، بھارت نے بھی جوابی اقدام کے طور پر پاکستانی طیاروں کے لیے اپنی فضائی حدود بند کر رکھی ہے، جس سے دونوں ممالک کے درمیان فضائی روابط مکمل طور پر معطل ہو چکے ہیں۔ یہ فیصلہ موجودہ جغرافیائی کشیدگی کے تناظر میں کیا گیا ہے، اور ماہرین کا کہنا ہے کہ اگر دونوں ممالک کے درمیان کشیدگی میں کمی نہ آئی تو یہ پابندیاں طویل المدتی بھی ہو سکتی ہیں۔