قونصل جنرل عامر احمد اتوزئی کی "صوفی نائٹ” میں شرکت

نیویارک میں پاکستان کے قونصل جنرل عامر احمد اتوزئی نے آل اباؤٹ یو ایس اے کے زیر اہتمام منعقدہ صوفی نائٹ میں شرکت کی۔ یہ تنظیم پاکستانی امریکی کمیونٹی  کی فلاح و بہبود کے لیے سرگرم ہے۔اس روحانی و ثقافتی شام میں پاکستان کے صوفیانہ فن موسیقی کو اجاگر کیا گیا، جس نے حاضرین کو ایک گہرا روحانی اور ثقافتی تجربہ فراہم کیا۔ صوفی نائٹ” کا مقصد کمیونٹی کے درمیان ہم آہنگی کو فروغ دینا اور شرکاء کو اپنی ثقافت سے دوبارہ جُڑنے کا موقع فراہم کرنا تھا۔ اس موقع پر پیش کیے گئے صوفیانہ کلام اور دھنیں پاکستان کے روحانی و تخلیقی ورثے کی نمائندگی کر رہی تھیں، جنہیں حاضرین نے بھرپور انداز میں سراہا۔

اپنے خطاب میں قونصل جنرل عامر احمد اتوزئی نے پاکستانی امریکیوں کی آبادکاری اور سماجی انضمام کے لیے "آل اباؤٹ یو ایس اے” کی کاوشوں کو سراہا۔ انہوں نے تنظیم کے اس کردار کو قابلِ تحسین قرار دیا جو وہ امریکہ میں مقیم پاکستانیوں کو ان کی ثقافتی شناخت برقرار رکھتے ہوئے نئے چیلنجز کا سامنا کرنے میں ادا کر رہی ہے۔ قونصل جنرل نے اس بات پر زور دیا کہ ثقافتی تقریبات، خصوصاً صوفی نائٹ جیسی تقریبات، نئی نسل کو اپنی جڑوں سے جوڑنے، کمیونٹی میں اتحاد، فخر اور تعلق کا احساس پیدا کرنے میں کلیدی کردار ادا کرتی ہیں۔  یہ تقریب کمیونٹی کی جانب سے بے حد سراہا گئی اور بیرونِ ملک مقیم پاکستانیوں میں ثقافتی آگاہی اور ہم آہنگی کو فروغ دینے کی ایک اہم کوشش ثابت ہوئی۔