اسکویڈ گیم سیزن ٹو کی تصدیق، خونی کھیل کا کھیل ابھی ختم نہیں ہوا

نیٹ فلیکس کی کامیاب ترین کورین ویب سیریز ‘اسکویڈ گیم’ کا سیزن ون ختم ہوا تو کامیاب ترین ڈراموں میں جگہ بنانے والی اس سیریز کے بخار میں مبتلا شائقین میں سیزن ٹو سے متعلق گفتگو اور انتظار کی شدت دیکھنے کو مل رہی ہے۔ سوشل میڈیا پر صارفین سمیت فلمی شائقین یہ سوال کرتے نظر آرہے ہیں کہ اس سیریز کا سیزن ٹو کب آئے گا؟ جس پر اسکویڈ گیم کے رائٹر اور ڈائریکٹر ہوانگ ڈونگ ہیوک نے کورین میڈیا کو انٹریو دیتے ہوئے سیزن ٹو کی تصدیق کی ہے۔ انکا کہنا تھا کہ سیریز کی مقبولیت کو دیکھتے ہوئے وہ اس سیریز کا صرف سیکنڈ سیزن ہی نہیں تیار کریں گے بلکہ تیسرے سیزن پر بھی کام کیا جائے گا۔

ہوانگ ڈونگ نے واضح کرتے ہوئے کہا کہ میری سیزن 2 کے ساتھ ساتھ سیزن 3 کے لیے نیٹ فلیکس سے بات چیت جاری ہے، ہم کسی بھی وقت حتمی نتیجے پر پہنچ سکتے ہیں۔ نئے سیزن کی کہانی سے متعلق بتایا کہ دوسرے سیزن کی کہانی اسکویڈ گیم کے مرکزی کردار ’جی ہن‘ کے گرد گھومے گی جو اس جان لیوا ٹورنامنٹ کو جیتنے میں کامیاب ہوا بلکہ اختتام پر وہ گیم کو روکنے کے لیے بھی تیار نظر آتا ہے۔

اسکویڈ گیم ڈائریکٹر کے مطابق دوسرے سیزن میں سیریز کے پراسرار اور نقاب پوش فرنٹ مین کی جانب بھی توجہ مرکوز کی جاسکتی ہے تاہم ابھی نئے سیزن کی تاریخ نہیں بتائی گئی لہذا مداحوں کو مزید کچھ عرصے تک انتظار کرنا ہوگا۔ 17 ستمبر کو ریلیز ہونے والی کورین ویب سیریز اسکویڈ گیم نیٹ فلیکس پر اب تک سب سے زیادہ دیکھی جانے والی ورلڈ وائیڈ سیریز بن گئی ہے اور گزشتہ 15 ہفتوں سے نیٹ فلیکس کے ٹاپ 10 شوز کی فہرست میں پہلی پوزیشن پر براجمان ہے۔

مزید جانیے:

آخر ’اسکویڈ گیم‘ نے کیوں سب کو دیوانہ بنادیا؟

صرف 28 دنوں میں 11کروڑ 10لاکھ افراد کا ’اسکویڈ گیم‘ دیکھنے کا نیا ریکارڈ