سانحہ گل پلازہ، شہدا کے اہلخانہ کو ایک کروڑ روپے فی کس دینے کی منظوری

سندھ کابینہ نے سانحہ گل پلازہ میں شہید ہونے والے اہلخانہ کے لیے فی کس ایک کروڑ روپے دینے کی منظوری دے دی ہے۔ وزیراعلیٰ سندھ مراد علی شاہ کی زیر صدارت ہونے والے اجلاس میں بتایا گیا کہ متاثرہ دکانداروں کو کچن اور یوٹیلیٹی اخراجات کے لیے کمشنر کراچی کے ذریعے فی دکان پانچ پانچ لاکھ روپے فراہم کیے جا رہے ہیں۔ کابینہ نے متاثرہ دکانداروں کو کاروبار دوبارہ شروع کرنے کے لیے ایک ایک کروڑ روپے بلا سود قرض دینے کی بھی منظوری دی۔ وزیراعلیٰ نے کہا کہ یہ قرضہ دکانداروں کو دوبارہ کاروبار شروع کرنے میں مدد فراہم کرے گا اور اس پر واجب الادا سود حکومت سندھ ادا کرے گی۔سانحہ گل پلازہ پر افسوس کا اظہار کرتے ہوئے کابینہ نے ایک سب کمیٹی قائم کی، جس میں وزراء شرجیل انعام میمن، ناصر حسین شاہ، سعید غنی اور ضیاء الحسن لنجار شامل ہیں۔ سب کمیٹی کمشنر کراچی کی سربراہی میں قائم انکوائری کمیٹی کی رپورٹ کا جائزہ لے گی اور اس کی روشنی میں مزید کارروائی اور لائحہ عمل طے کرے گی۔

سندھ کابینہ نے گل پلازہ میں جاں بحق ہونے والے افراد کے لواحقین کیلئے ایک ایک کروڑ روپے دینے کی منظوری دے دی، گل پلازہ کے متاثرین دکانداروں کیلئے فوری طور پر متبادل جگہ دیکھی جارہی ہے تاکہ ان کو دوبارہ اپنے پیروں پر کھڑا کیا جاسکے، سینئر وزیر سندھ شرجیل انعام میمن pic.twitter.com/D2Dmp7bNY7

— Sindh Information Department (@sindhinfodepart) January 27, 2026

وزیراعلیٰ نے اس بات پر زور دیا کہ متاثرہ دکانداروں کو دو ماہ کے اندر اپنی دکانیں دوبارہ کھولنے کی سہولت فراہم کی جائے گی، اور حکومت سندھ ہر ممکن اقدامات کرے گی تاکہ دکانداروں کی حفاظت اور سہولت یقینی بنائی جا سکے۔