جدہ کے ریڈ سٹی انٹرنیشنل فلمی میلے میں ’83‘ کا رنگا رنگ پریمئیر

سعودی شہر جدہ  کے  ریڈ سٹی انٹرنیشنل فلمی میلے میں دنیا بھر کی کئی تخلیقات کی نمائش ہوئی لیکن سب کو انتظار تھا تو بالی وڈ فلم ’83‘ کا۔ جس میں رنویر سنگھ، کپل دیو کا کردار ادا کررہے ہیں۔ جبکہ یہ تخلیق 1983میں بھارتی ٹیم کے عالمی کپ جیتنے کے گرد گھوم رہی ہے۔ اسی لیے جب ستاروں کی کہکشاں زمین پر اتری تو ہر پرستار کا چہرہ کھل اٹھا۔ رنویر سنگھ، اہلیہ دپیکا پدوکون بھی اس تقریب میں شریک ہوئیں،

جو مووی میں بھی رنویر سنگھ کی بیوی کا کردار ادا کررہی ہیں۔ اس موقع پر 1983کے مین آف دی میچ مہندر امر ناتھ کو بھی خصوصی طور پر مدعو کیا گیا تھا۔ رنویر سنگھ اور دپیکا پدوکون جب ریڈ کارپٹ پر جلوہ افروز ہوئے تو چاہنے والے ان کی ایک جھلک دیکھنے کے لیے بے تاب اور بے چین رہے۔

دپیکا پدوکون اپنی حسین و جمیل لباس اور انداز کی وجہ سے مرکز نگاہ رہیں۔ جن کے ساتھ پرستاروں نے ڈھیر ساری تصاویر اتروائیں۔ رنویر سنگھ کا کہنا تھا کہ کپل دیو کا کردار ادا کرنا اُن کی زندگی کا مشکل ترین کردار تھا لیکن وہ ہدایتکار کبیر خان اور کپل دیو کے ممنون ہیں، جنہوں نے فلم کی عکس بندی کے دوران ان کی ہر مرحلے پر مدد کی۔

بالی وڈ فلم ’83مووی‘ 24دسمبر کو سنیما گھروں کی زینت بننے جارہی ہے۔ جس کو صرف بھارت ہی نہیں دنیا بھر کے سنیما گھروں میں سجایاجائے گا۔

اسی بارے میں مزید جاننے کے لیے کلک کریں:

فلم ’83‘ جس میں سابق ویسٹ انڈین کرکٹرز کے بیٹے بھی اداکاری کے میدان میں