ایڈیلیڈ ٹیسٹ میں آسٹریلیا کی پوزیشن مستحکم،انگلینڈ پھر مشکل کا شکار

ایشز ٹیسٹ کا دوسرا دن آسٹریلوی بلے بازوں کے نام رہا۔ لبوشان نے شاندار سنچری اسکور کی۔ جبکہ ڈیوڈ وارنر95 اور اسٹیو اسمتھ 93رنز بنا کر سنچری سے محروم رہے۔ آسٹریلیا نے 473رنز بنا کر اننگ ختم کرنے کا اعلان کیا۔ انگلینڈ کی جانب سے بین اسٹروکس نے سب سے زیادہ 3شکار کیے جبکہ جیمز اینڈرسن کے حصے میں 2وکٹیں آئیں۔

آسٹریلیا کی جانب سے وکٹ کیپر بلے باز الیکس کیری نے نصف سنچری اسکور کی۔ جبکہ آخری لمحات مچل اسٹارک نے دھواں دھار انداز میں 39رنز اسکور کیے۔ جواب میں انگلینڈ نے اپنی اننگ کا آغاز کیا، صرف 7رنز پر روئے برنز آؤٹ ہوگئے۔ کھیل کم روشنی کی بنا پر جلد ختم ہوا تو انگلینڈ نے 2کھلاڑیوں کے نقصان پر 17رنز جوڑ لیے تھے۔ میزبان آسٹریلیا کے اسکور تک پہنچنے کے لیے انگلینڈ کو مزید 456رنز درکار ہیں۔ وکٹ پر کپتان جو روٹ اور ڈیوڈ میلان ہیں۔