محکمہ موسمیات نے 16 سے 25 جنوری کے دوران غیر معمولی یا تاریخی سردی کی پیش گوئیوں کو بے بنیاد قرار دیتے ہوئے واضح کیا ہے کہ ایسی کوئی شدید لہر متوقع نہیں۔ محکمے کا کہنا ہے کہ سوشل میڈیا پر گردش کرنے والی پیش گوئیاں غیر مصدقہ ہیں، جن میں میدانی علاقوں میں درجہ حرارت صفر سے نیچے جانے جیسے دعوے شامل ہیں، جن کی کوئی سائنسی بنیاد موجود نہیں۔محکمہ موسمیات نے دو ٹوک انداز میں کہا ہے کہ مذکورہ عرصے کے دوران ریکارڈ توڑ سردی یا غیر معمولی موسمی صورتحال کا امکان نہیں۔ یہ وضاحت اس وقت سامنے آئی ہے جب حالیہ دنوں میں بعض موسمیاتی ماہرین کی جانب سے سائبیریا کی یخ بستہ ہواؤں کے خطّے پر اثر انداز ہونے کے خدشات ظاہر کیے جا رہے تھے۔ ان دعوؤں میں کہا جا رہا تھا کہ دہائیوں بعد پڑنے والی شدید سردی پنجاب، خیبر پختونخواہ کے میدانی علاقوں سے لے کر سندھ تک درجہ حرارت کو نقطہ انجماد سے نیچے لے جا سکتی ہے، تاہم محکمہ موسمیات نے ان تمام قیاس آرائیوں کو مسترد کر دیا ہے۔
دوسری جانب صوبائی ڈیزاسٹر مینجمنٹ اتھارٹی نے 16 جنوری تک سرد موسم کے حوالے سے احتیاطی الرٹ جاری کر دیا ہے۔ پی ڈی ایم اے کے مطابق راولپنڈی، مری، گلیات اور پوٹھوہار کے علاقوں میں شدید سردی کے ساتھ برفباری کے امکانات موجود ہیں، جب کہ دھند اور اسموگ کی شدت میں بھی اضافہ متوقع ہے۔ اس صورتحال کے پیش نظر سیاحت، تعلیم، صحت، زراعت، لوکل گورنمنٹ، جنگلات اور دیگر متعلقہ محکموں کو الرٹ جاری کر دیا گیا ہے۔ ملک کے مختلف حصوں میں سردی کی شدت برقرار ہے اور کئی شہروں میں گھنی دھند نے روزمرہ زندگی کو بری طرح متاثر کر رکھا ہے۔ لاہور میں درجہ حرارت 4 ڈگری سینٹی گریڈ ریکارڈ کیا گیا، جب کہ کراچی میں سرد ہواؤں کے باعث کم سے کم درجہ حرارت 6 ڈگری تک گر گیا ہے۔ ملتان میں حدِ نگاہ کم ہونے سے آمدورفت متاثر ہے، جب کہ بالائی علاقوں میں پارہ نقطہ انجماد سے نیچے جا چکا ہے۔ محکمہ موسمیات کے مطابق گلگت بلتستان میں آج رات ہلکی برفباری کا امکان بھی موجود ہے۔ شدید سردی اور دھند کے باعث سڑکیں سنسان دکھائی دے رہی ہیں اور ٹریفک معمول سے کہیں کم ہے، جس سے نظامِ زندگی متاثر ہو رہا ہے۔ماہرینِ صحت نے خاص طور پر بچوں اور بزرگوں کو سرد موسم سے محفوظ رکھنے پر زور دیا ہے۔
خشک سردی کے باعث نزلہ، زکام، کھانسی اور دیگر موسمی امراض میں اضافہ دیکھنے میں آ رہا ہے۔ طبی ماہرین نے شہریوں کو گرم لباس کے استعمال، احتیاطی تدابیر اختیار کرنے اور کمزور طبقات کا خصوصی خیال رکھنے کی ہدایت کی ہے۔محکمہ موسمیات کے مطابق آئندہ چند روز تک سردی اور دھند کی کیفیت برقرار رہ سکتی ہے، اس لیے عوام کو محتاط رہنے کا مشورہ دیا گیا ہے۔
Discussion about this post