احمد عزیر نے آئرن مین 70.3 انطالیہ مکمل کرنے کا اعزاز حاصل کر لیا

پاکستان کے ایتھلیٹ احمد عزیر نے عالمی اسپورٹس میں پاکستان کا نام روشن کر دیا ہے۔ انہوں نے ترکی کے شہر انطالیہ میں ہونے والے ہاف آئرن مین 70.3 ایونٹ کو کامیابی کے ساتھ مکمل کرنے کا منفرد اعزاز حاصل کیا، اور اس مقابلے میں حصہ لینے والے دنیا کے نوے ممالک کے ایتھلیٹس میں واحد پاکستانی قرار پائے۔یہ ایونٹ سوئمنگ، بائیک رائیڈ اور رننگ پر مشتمل ہوتا ہے، جس میں ایتھلیٹس کو 1.9 کلو میٹر اوپن واٹر سوئمنگ، 90 کلو میٹر بائیک رائیڈ اور 21.1 کلو میٹر رننگ کرنی پڑتی ہے، جو جسمانی اور ذہنی مضبوطی کا امتحان ہوتا ہے۔ احمد عزیر نے اس چیلنج کو نہایت حوصلے اور محنت سے عبور کیا۔ انطالیہ کے ایونٹ میں انگلینڈ کے سیم بارلے ٹاپ پر رہے، تاہم احمد عزیر کی کارکردگی پاکستان کے لیے ایک فخر کا لمحہ ثابت ہوئی۔ احمد عزیر کوہ پیمائی کے ساتھ دنیا کی مختلف میراتھنز میں بھی حصہ لیتے رہے ہیں، اور ان کی اہلیہ انعم عزیر بھی ایک کوہ پیما اور رنر ہیں، جس سے ان کے خاندانی جوش اور کھیلوں کے جذبے کا پتہ چلتا ہے۔احمد عزیر نے کہا کہ سمندر کے کنارے ہونے والا یہ ایونٹ انتہائی چیلنجنگ ہوتا ہے، یہ ورلڈ سیریز کا حصہ ہے اور مقابلہ سخت ہوتا ہے، لہٰذا اسے مکمل کرنا ایتھلیٹس کے لیے ایک بڑا اعزاز سمجھا جاتا ہے۔ ان کی یہ کامیابی پاکستان کے کھیلوں کی تاریخ میں ایک یادگار باب ہے۔