امریکی ناظم الامور کی پاکستانی طلبا کے لیے خوشخبری

امریکی ناظم الامور نیٹلی بیکر نے پاکستانی طلبا کے لیے خوشخبری کا اعلان کر دیا ہے۔ نجی ٹی وی چینل سے  گفتگو کرتے ہوئے انہوں نے بتایا کہ پاکستان میں فل برائٹ اسکالرشپ پروگرام موجود ہے، جو عوام سے عوام کے تعلقات کو مضبوط بنانے اور ثقافتی تبادلے کے فروغ کے لیے بہترین موقع فراہم کرتا ہے۔ نیٹلی بیکر نے کہا کہ اس پروگرام کے ذریعے اسکالرز نہ صرف تعلیم حاصل کرتے ہیں بلکہ ایک دوسرے کی ثقافت کو سمجھنے اور سراہنے کا سنہری موقع بھی پاتے ہیں۔ انہوں نے واضح کیا کہ یہ اسکالرشپ پروگرام پاکستانی طلبا کے لیے امریکا میں تعلیم اور علمی ترقی کے راستے کھولتا ہے اور نوجوان نسل کی صلاحیتوں کو نکھارنے میں اہم کردار ادا کرتا ہے۔

امریکی ناظم الامور نے پاکستان کے ثقافتی حسن اور شمالی علاقوں کی خوبصورتی کی بھی تعریف کی، اور کہا کہ ہنزہ اور فیری میڈوز جیسے مقامات ان کے دل کے قریب ہیں۔ انہوں نے کہا کہ وہ پاکستان کو اپنا دوسرا گھر سمجھتی ہیں اور یہاں کے سرحدی علاقوں میں تعلیم کے فروغ کے لیے منصوبوں پر بھرپور توجہ دیں گی، خاص طور پر خیبرپختونخوا میں نوجوانوں کے لیے تعلیمی مواقع کو بڑھانے کے لیے اقدامات کیے جائیں گے۔ نیٹلی بیکر نے زور دیا کہ پاکستانی نوجوان نسل میں بے پناہ صلاحیتیں موجود ہیں اور فل برائٹ اسکالرشپ پروگرام کے ذریعے انہیں عالمی معیار کی تعلیم اور ثقافتی تجربات کے مواقع فراہم کیے جا رہے ہیں، تاکہ وہ نہ صرف اپنے ملک بلکہ عالمی سطح پر بھی اپنی قابلیت کا لوہا منوا سکیں۔