سلامتی کونسل کے غیر مستقل رکن پاکستان کی اپنی ذمہ داریوں کا آغاز

پاکستان نے اقوام متحدہ میں سلامتی کونسل کے بطور غیر مستقل رکن کی حیثیت سے اپنی 2 سالہ مدت کی ذمہ داریاں سنبھال لی ہیں۔ اس حوالے سے  اقوام متحدہ میں تقریب  کا انعقاد ہوا۔ جس میں پاکستان کے نمائندے عاصم افتخار نے سلامتی کونسل کے غیر مستقل ارکان کے پرچم رکھنے کی رسم میں شرکت کی۔ اس دوران پاکستان کا پرچم سلامتی کونسل میں نصب کیا گیا۔ پاکستان کے ساتھ اس بار ڈنمارک، یونان، پاناما اور صومالیہ بھی غیر مستقل ارکان کے طور پر منتخب ہوئے ہیں۔ یاد رہے کہ پاکستان اقوام متحدہ کی سلامتی کونسل کے غیر مستقل رکن کے طور پر8 ویں  بار منتخب ہوا ہے، اور اس نے 193 رکن ممالک میں سے 182 ووٹ حاصل کر کے یہ حیثیت حاصل کی۔اقوام متحدہ میں پاکستان کے مستقل مندوب منیر اکرم کا کہنا تھا کہ  پاکستان سلامتی کونسل کے غیر مستقل رکن کے طور پر عالمی چیلنجز سے نمٹنے میں ایک فعال اور تعمیری کردار ادا کرے گا۔ عام طورپر غیر مستقل ارکان کی مدت 2  سال ہوتی ہے ۔