پاکستانیوں کا امارات کا سب سے بڑا جھنڈا بنا کر گنیز ورلڈ ریکارڈ

دبئی کی پاکستانی کمیونٹی نے متحدہ عرب امارات کے اتحاد، ہم آہنگی اور ثقافتی تنوع کو ایک منفرد انداز میں دنیا کے سامنے پیش کرتے ہوئے ایک شاندار کارنامہ انجام دیا ہے۔ انہوں نے انسانی ہاتھوں کے نشانات سے ایک ایسا عظیم الشان اماراتی جھنڈا تخلیق کیا، جو 24 ہزار 514 ہاتھوں کے نقوش پر مشتمل ہے اور اس نے گنیز ورلڈ ریکارڈ میں اپنا منفرد مقام حاصل کر لیا۔ یہ تاریخی تقریب پاکستان ایسوسی ایشن دبئی کے آڈیٹوریم میں 22 مئی کو منعقد ہوئی، جس میں دنیا بھر سے تعلق رکھنے والے 100 سے زائد مختلف قومیتوں کے افراد نے حصہ لیا۔ بھارتی، بنگلہ دیشی، فلپینی، عرب اور دیگر کئی قوموں کے لوگوں کی شمولیت نے اس تقریب کو نہ صرف رنگین اور متنوع بنایا بلکہ متحدہ عرب امارات کی ‘اتحاد میں طاقت’ کے فلسفے کو بھی بھرپور انداز میں اجاگر کیا۔

امارات میں پاکستان کے سفیر فیصل نیاز ترمذی اور قونصل جنرل حسین محمد نے نہایت جوش و خروش سے اس ریکارڈ کی تصدیق کی۔ سفیر فیصل نیاز ترمذی نے اس عظیم کامیابی کو ‘دلوں کے نشانات’ قرار دیتے ہوئے کہا کہ یہ اقدام متحدہ عرب امارات کے صدر شیخ محمد بن زید النہیان کے وژن کی بہترین عکاسی کرتا ہے اور پاکستانی کمیونٹی اور امارات کے درمیان مضبوط روابط کی مثال ہے۔ یہ پروجیکٹ پاکستان ایسوسی ایشن دبئی اور ایمریٹس لوز پاکستان کی مشترکہ کوشش کا نتیجہ ہے، جس کا تخلیقی تصور اور رہنمائی فنکارہ رباب زہرا نے دی۔ تقریباً ایک ماہ جاری رہنے والی اس مہم کا آغاز 13 اپریل کو پاکستان ہیلتھ ویک کے موقع پر دبئی کے الکوز علاقے سے کیا گیا تھا، جہاں سے اس پُرعزم تحریک نے زور پکڑا۔ گنیز ورلڈ ریکارڈز کی جج ایمبالی نکوسی نے اس کارنامے کو بے مثال اور ناقابل یقین قرار دیتے ہوئے پاکستانی کمیونٹی، پاکستان ایسوسی ایشن دبئی، ایمریٹس لوز پاکستان اور رباب زہرا کو زبردست خراج تحسین پیش کیا۔

پاکستان ایسوسی ایشن دبئی کے صدر ڈاکٹر فیصل اکرام نے اس کامیابی پر خوشی کا اظہار کرتے ہوئے کہا کہ یہ نمایاں کارنامہ متحدہ عرب امارات کے ‘ایئر آف کمیونٹی 2025ء’ کے اصولوں کی پوری معنویت میں نمائندگی کرتا ہے  جہاں اتحاد، یکجہتی اور باہمی تعاون کو سب سے اعلیٰ مقام حاصل ہے۔ یہ کامیابی نہ صرف پاکستانی کمیونٹی کے جذبے اور تخلیقی صلاحیتوں کی گواہ ہے بلکہ متحدہ عرب امارات کے اندر بسنے والے ہر فرد کے لیے فخر اور امید کی علامت بھی ہے، جو ایک دوسرے کے ساتھ مل کر ایک خوشحال، پرامن اور خوشگوار معاشرہ تشکیل دے رہے ہیں۔