امریکی صدر ڈونلڈ ٹرمپ نے دعویٰ کیا ہے کہ اسرائیل نے غزہ میں 60 روزہ جنگ بندی کے لیے درکار شرائط سے اتفاق کر لیا ہے۔ صدر ٹرمپ نے یہ بات اپنے سوشل میڈیا پلیٹ فارم ‘ٹروتھ سوشل’ پر جاری ایک بیان میں کہی، جس میں انہوں نے بتایا کہ امریکی نمائندوں نے اسرائیلی حکام سے طویل اور نتیجہ خیز ملاقات کی ہے۔ صدر ٹرمپ نے لکھا:
"میرے نمائندوں نے آج غزہ کے حوالے سے اسرائیلی حکام کے ساتھ ایک طویل اور نتیجہ خیز ملاقات کی، جس میں اسرائیل نے 60 روزہ جنگ بندی کو حتمی شکل دینے کے لیے درکار شرائط سے اتفاق کر لیا ہے۔ اس مدت کے دوران ہم تمام فریقین کے ساتھ مل کر جنگ کے خاتمے کے لیے کام کریں گے۔”
صدر ٹرمپ کے مطابق، قطر اور مصر نے امن عمل کے لیے اہم اور انتھک سفارتی کوششیں کی ہیں، اور یہی دونوں ممالک اب یہ حتمی تجویز حماس کے سامنے رکھیں گے۔ انہوں نے کہا:
"مجھے امید ہے کہ مشرقِ وسطیٰ کے وسیع تر مفاد میں حماس اس معاہدے کو قبول کرے گی، کیونکہ ایسا موقع دوبارہ نہیں ملے گا۔ اس کے بعد صرف حالات مزید خراب ہوں گے۔”
صدر ٹرمپ نے گزشتہ روز اعلان کیا تھا کہ وہ آئندہ ہفتے اسرائیلی وزیر اعظم بنجمن نیتن یاہو سے وائٹ ہاؤس میں ملاقات کریں گے، جہاں غزہ کی صورتحال اور ایران کے حوالے سے بھی گفتگو کی جائے گی۔ فلوریڈا میں میڈیا سے بات کرتے ہوئے صدر ٹرمپ نے کہا کہ وہ نیتن یاہو سے فوری جنگ بندی پر نتیجہ خیز بات چیت کریں گے۔ صدر ٹرمپ نے مزید دعویٰ کیا کہ اسرائیلی وزیر اعظم بھی جنگ بندی کے خواہاں ہیں، اور انہیں امید ہے کہ آئندہ ہفتے اسرائیل اور حماس کے درمیان جنگ بندی اور یرغمالیوں کی واپسی سے متعلق معاہدہ طے پا سکتا ہے۔
Discussion about this post