انگلینڈ نے باکسنگ ڈے ٹیسٹ دو دن میں جیت لیا

ابتدائی تین مقابلوں میں شکست کے بعد انگلینڈ نے ایشیز سیریز میں شاندار واپسی کرتے ہوئے پہلی کامیابی اپنے نام کر لی۔ میلبرن میں کھیلے گئے باکسنگ ڈے ٹیسٹ میں انگلش ٹیم نے 175 رنز کا ہدف چھ وکٹوں کے نقصان پر حاصل کر کے سیریز میں جان ڈال دی۔ انگلینڈ کی جانب سے ہدف کے تعاقب میں جیکب بیتھیل 40 رنز کے ساتھ نمایاں رہے، زیک کرولی نے 37 اور بین ڈکٹ نے 34 رنز کی عمدہ اننگز کھیلی۔ ہیری بروک 18 اور جیمی اسمتھ 3 رنز بنا کر ناٹ آؤٹ رہے، جب کہ جو روٹ 15، برائیڈن کارس 6 اور کپتان بین اسٹوکس صرف 2 رنز بنا کر پویلین لوٹ گئے۔ آسٹریلیا کی طرف سے بولنگ میں جھائی رچرڈسن، اسکاٹ بولینڈ اور مچل اسٹارک نے دو، دو وکٹیں حاصل کیں، تاہم وہ انگلینڈ کو فتح سے نہ روک سکے۔ یہ ایشیز کی تاریخ کا ایک اہم لمحہ بھی ثابت ہوا، کیونکہ اسٹیو اسمتھ کی قیادت میں آسٹریلوی ٹیم کو پہلی مرتبہ شکست کا سامنا کرنا پڑا۔ اس سے قبل میچ کے دوسرے روز آسٹریلیا نے اپنی دوسری اننگز کا آغاز چار رنز بغیر کسی نقصان کے کیا، مگر پوری ٹیم 132 رنز پر ڈھیر ہو گئی۔ ٹریوس ہیڈ نے 46 رنز کی مزاحمتی اننگز کھیلی، جب کہ کپتان اسٹیو اسمتھ 24 رنز بنا کر ناٹ آؤٹ رہے۔ انگلینڈ کی جانب سے برائیڈن کارس نے چار وکٹیں حاصل کیں، بین اسٹوکس نے تین، جوش ٹنگ نے دو اور گس ایٹکنسن نے ایک کھلاڑی کو آؤٹ کیا۔

میچ کے آغاز میں انگلش کپتان بین اسٹوکس نے ٹاس جیت کر آسٹریلیا کو پہلے بیٹنگ کی دعوت دی۔ آسٹریلوی ٹیم پہلی اننگز میں 152 رنز پر آل آؤٹ ہو گئی۔ جواب میں انگلینڈ کی پوری ٹیم محض 110 رنز پر ڈھیر ہو گئی، جس کے باعث آسٹریلیا کو 42 رنز کی برتری حاصل ہوئی۔ پہلے دن کے اختتام پر آسٹریلیا نے دوسری اننگز میں بغیر کسی نقصان کے چار رنز بنا لیے تھے۔واضح رہے کہ دونوں ٹیمیں اپنی پہلی اننگز میں ایک ہی دن آل آؤٹ ہو گئی تھیں، جب کہ یہ سیریز کا دوسرا ٹیسٹ میچ تھا جو صرف دو دن میں ہی اپنے اختتام کو پہنچ گیا۔ انگلینڈ کی یہ فتح نہ صرف سیریز میں اس کی پہلی کامیابی ہے بلکہ ایشیز کی تاریخ میں ایک یادگار باب بھی ثابت ہوئی۔