صائم ایوب ٹی ٹوئنٹی کرکٹ میں نمبر ون آل راؤنڈر

آئی سی سی نے نئی پلیئرز رینکنگ جاری کر دی ہے، جس میں پاکستانی آل راؤنڈر صائم ایوب ایک بار پھر ٹی ٹوئنٹی کرکٹ کے نمبر ون آل راؤنڈر کے طور پر سامنے آئے ہیں۔ 294 ریٹنگ پوائنٹس کے ساتھ صائم ایوب نے زمبابوے کے سکندر رضا کو پیچھے چھوڑتے ہوئے پہلی پوزیشن حاصل کر لی ہے۔ یہ ان کا دوسرا موقع ہے جب وہ نمبر ون آل راؤنڈر بنے ہیں، پہلے وہ اکتوبر کے پہلے ہفتے میں بھی اس مقام پر فائز ہوئے تھے۔اسی رینکنگ میں محمد نواز نے بھی شاندار کارکردگی کا مظاہرہ کرتے ہوئے ساتویں نمبر سے چوتھی پوزیشن تک ترقی کر لی ہے۔ ٹی ٹوئنٹی بیٹنگ رینکنگ میں ابھیشیک شرما پہلے نمبر پر ہیں جبکہ انگلینڈ کے فل سالٹ دوسری پوزیشن پر ہیں۔ صاحبزادہ فرحان کی دو درجہ تنزلی ہوئی ہے اور وہ چوتھے سے چھٹے نمبر پر آ گئے ہیں۔ٹی ٹوئنٹی باؤلنگ رینکنگ میں ابرار احمد بھی نمایاں ترقی کرتے ہوئے آٹھویں پوزیشن سے چوتھے نمبر پر پہنچ گئے ہیں، جبکہ محمد نواز دو درجے ترقی کے بعد 11 ویں پوزیشن پر آ گئے ہیں۔ون ڈے رینکنگ میں بھی دلچسپ تبدیلیاں دیکھنے کو ملیں، جہاں ویرات کوہلی ایک درجہ ترقی کرتے ہوئے چوتھے نمبر پر پہنچ گئے ہیں۔

بابر اعظم کی ون ڈے رینکنگ میں چھٹی پوزیشن برقرار ہے، اور ون ڈے باؤلنگ رینکنگ میں ابرار احمد اپنی نویں پوزیشن برقرار رکھے ہوئے ہیں۔یہ نئی رینکنگ نہ صرف کھلاڑیوں کی مسلسل محنت اور کارکردگی کی عکاس ہے بلکہ عالمی کرکٹ میں پاکستانی کھلاڑیوں کی بڑھتی ہوئی شاندار موجودگی کا بھی ثبوت فراہم کرتی ہے۔