آج سال کا سب سے بڑا ’سپر مون‘ ہوگا

آج 5 نومبر کی شام دنیا بھر میں ایک شاندار فلکیاتی منظر دیکھنے کو ملے گا ۔ سال کا سب سے بڑا اور روشن سپر مون آسمان پر جلوہ گر ہوگا، جو پاکستان سمیت کئی ممالک میں پوری آب و تاب سے دکھائی دے گا۔ سپارکو کے مطابق یہ اس سال کے تین سپر مونز میں سے دوسرا سپر مون ہے، جو اپنے حجم اور روشنی میں غیر معمولی اضافہ ظاہر کرے گا۔ فلکیاتی ماہرین کے مطابق سپر مون اس وقت بنتا ہے جب چاند اپنے مدار میں گردش کرتے ہوئے زمین کے سب سے قریب پہنچ جاتا ہے، اور اسی دوران وہ مکمل چاند کی حالت میں ہوتا ہے۔ یہی قربت چاند کو معمول سے زیادہ بڑا اور روشن بنا دیتی ہے۔ ترجمان سپارکو کے مطابق آج شام 6 بج کر 19 منٹ پر چاند اپنی روشن ترین حالت میں ہوگا۔ اس لمحے زمین اور چاند کے درمیان فاصلہ صرف 2 لاکھ 21 ہزار 817 میل رہ جائے گا، جس کے باعث چاند عام دنوں کے مقابلے میں تقریباً 10 فیصد بڑا اور 16 فیصد زیادہ روشن دکھائی دے گا۔یہ مظہر اس سال کے تین سپر مونز میں سے دوسرا ہے، جبکہ اگلا سپر مون دسمبر میں دیکھا جا سکے گا۔ ماہرین نے بتایا کہ یہ ’’بیور سپر مون‘‘ اپنے حجم اور چمک کے لحاظ سے سال کا سب سے نمایاں اور دلکش چاند ہوگا۔ پاکستان میں سردیوں کی صاف فضا اس نظارے کو مزید شاندار بنا دے گی۔ ماہرین کا مشورہ ہے کہ شہری روشنیوں سے دور، کھلے اور اندھیرے علاقوں میں جائیں تاکہ اس قدرتی مظہر کا لطف بھرپور انداز میں اٹھایا جا سکے۔ یہ سپر مون نہ صرف فلکیاتی ماہرین بلکہ عام شہریوں کے لیے بھی ایک یادگار لمحہ ہوگا۔ ایک ایسا منظر جو قدرت کی خوبصورتی اور کائنات کی وسعت کو ایک نئے زاویے سے دکھاتا ہے۔