روسی حکومت نے پاکستانی طلباء کے لیے ایک شاندار تعلیمی موقع فراہم کرتے ہوئے نئے اسکالرشپ پروگرام کے آغاز کا اعلان کر دیا ہے، جس کے تحت پاکستانی طلباء اب روس کی معروف جامعات میں بیچلرز، ماسٹرز اور پی ایچ ڈی کی ڈگریوں کے حصول کے لیے درخواست دے سکیں گے۔ اسلام آباد میں روسی سفارت خانے کے ترجمان ایگور کولیسنیکوف نے گفتگو میں بتایا کہ رشیئن سینٹر فار سائنس اینڈ کلچر پاکستان میں وہ واحد ادارہ ہے جو اس اسکالرشپ کے تحت طلباء کو نامزد کرنے کا مجاز ہے۔ ترجمان کے مطابق یہ اسکالرشپ پروگرام ڈگری کی مکمل مدت پر محیط ہوگا، جس میں طلباء کو ماہانہ وظیفہ (اسٹائپنڈ) دیا جائے گا۔ داخلہ اور ٹیوشن فیس بالکل مفت ہوگی، تاہم طلباء کو سفر اور روزمرہ اخراجات خود برداشت کرنا ہوں گے۔ روسی حکومت کے اس اقدام کا مقصد تعلیم کے میدان میں پاکستان اور روس کے مابین تعلقات کو مزید مضبوط بنانا اور نوجوان پاکستانیوں کو اعلیٰ تعلیم کے عالمی مواقع فراہم کرنا ہے۔ اسکالرشپ کے لیے درخواستیں روسی فیڈریشن کے سرکاری تعلیمی پورٹل پر آن لائن جمع کرائی جا سکتی ہیں۔
درخواست دہندگان کو اپنی پسند کے شعبے اور ڈگری پروگرام کا انتخاب کرنے کے بعد متعلقہ تعلیمی دستاویزات اپ لوڈ کرنا ہوں گی۔ درخواستیں جمع کروانے کی آخری تاریخ 15 جنوری 2026ء مقرر کی گئی ہے۔ شارٹ لسٹ کیے گئے امیدواروں کو بعد ازاں میڈیکل اور فٹنس سرٹیفکیٹس کے ساتھ ان کے مصدقہ روسی ترجمے جمع کروانے ہوں گے۔روسی حکام کے مطابق، طلباء کے انتخاب کا عمل مکمل طور پر میرٹ، تعلیمی قابلیت اور متعلقہ اداروں کی جانچ پر مبنی ہوگا۔یہ اسکالرشپ پروگرام پاکستان کے نوجوانوں کے لیے نہ صرف روس کے اعلیٰ تعلیمی اداروں کے دروازے کھولے گا بلکہ دونوں ممالک کے درمیان علمی، ثقافتی اور سائنسی تعاون کو بھی نئی بلندیوں تک لے جائے گا۔
Discussion about this post