امریکہ میں مقیم ممتاز پاکستانی بزنس مین اور ہلالِ امتیاز یافتہ تنویر احمد نے پاکستان کے اسمارٹ ولیجز انیشی ایٹو کے لیے دو لاکھ پچاس ہزار امریکی ڈالر عطیہ کرنے کا اعلان کیا ہے۔ یہ انقلابی منصوبہ دیہی برادریوں کو بااختیار بنانے اور ڈیجیٹل تقسیم کو ختم کرنے کے لیے ترتیب دیا گیا ہے۔ پہلے مرحلے میں پانچ اسمارٹ ولیجز قائم کیے جائیں گے جن پر فی گاؤں پچاس ہزار ڈالر لاگت آئے گی، جبکہ آئندہ مراحل میں مزید دیہات شامل کیے جائیں گے۔ اس منصوبے کے تحت مقامی آبادیوں کو ڈیجیٹل سروسز، ای-لرننگ، ٹیلی ہیلتھ اور جدید رابطے کی سہولتیں میسر آئیں گی، جو پاکستان کے پسماندہ علاقوں میں زندگیوں کو یکسر بدل دیں گی۔
یہ تاریخی اعلان وزیرِاعظم محمد شہباز شریف، نائب وزیرِاعظم اسحاق ڈار اور وفاقی وزیر برائے آئی ٹی و ٹیلی کام شزا فاطمہ خواجہ کی موجودگی میں کیا گیا۔ قومی قیادت نے تنویر احمد کے عزم و وابستگی کو سراہتے ہوئے کہا کہ یہ امریکا میں موجود پاکستانی کمیونٹی کے اُس کلیدی کردار کی بہترین مثال ہے جو وہ ملک کی ترقی میں ادا کر رہا ہے۔ سیالکوٹ سے تعلق رکھنے والے اور اس وقت سلیکان ویلی میں مقیم تنویر احمد نے پاکستان کی ڈیجیٹل تبدیلی میں اپنا حصہ ڈالنے کے عزم کا اظہار کرتے ہوئے کہا:
"یہ تو صرف آغاز ہے۔ اسمارٹ ولیجز نہ صرف لوگوں کو آپس میں جوڑیں گے بلکہ تعلیم، صحت اور کاروبار کے مواقع بھی فراہم کریں گے، جو دیہی پاکستان کو نئی سمت دیں گے۔”
اسمارٹ ولیجز کا منصوبہ سرکاری و نجی شعبے کے اشتراک اور ایک ایسے پاکستان کے خواب کی عکاسی کرتا ہے جو زیادہ اسمارٹ اور باہم مربوط ہو۔
Discussion about this post