سندھ : عیدالاضحیٰ کے موقع پر کانگو وائرس سے بچاؤ کی آگاہی مہم

سندھ میں عیدالاضحیٰ کے پیش نظر کانگو وائرس سے بچاؤ کے لیے محکمہ صحت سندھ کی جانب سے بھرپور آگاہی مہم کا آغاز کر دیا گیا ہے۔ شہریوں کی صحت و سلامتی کو مدنظر رکھتے ہوئے صوبے بھر کی 53 مویشی منڈیوں میں جراثیم کش اسپرے کیا گیا ہے، جبکہ 66 مقامات پر کمیونٹی سیشنز منعقد کیے گئے ہیں تاکہ عوام کو اس مہلک وائرس سے بچاؤ کے لیے آگاہ کیا جا سکے۔ محکمہ صحت کے مطابق کانگو وائرس ایک خطرناک متعدی مرض ہے جو عموماً جانوروں کی کھال سے چپکی ہوئی ٹک (چیچڑی) کے ذریعے انسانوں میں منتقل ہوتا ہے۔ اس وائرس کی شرح اموات 10 سے 40 فیصد تک بتائی جاتی ہے۔ یہ وائرس متاثرہ جانور کے خون یا جسمانی رطوبت سے بھی انسان میں منتقل ہو سکتا ہے، جس سے مویشیوں کے قریب رہنے والے افراد زیادہ خطرے میں ہوتے ہیں۔

کانگو وائرس کی نمایاں علامات:

• تیز بخار

• گردن، کمر اور پٹھوں میں شدید درد

• جسم پر سرخ دھبے

• متلی، قے اور گلے کی سوزش

• ناک، مسوڑھوں اور جسم کے اندرونی اعضا سے خون کا بہنا

محکمہ صحت سندھ نے عوام کو چند احتیاطی تدابیر اختیار کرنے کی سختی سے ہدایت دی ہے:

• مویشی منڈی جاتے وقت ہلکے رنگ کے، مکمل آستین والے کپڑے پہنیں۔

• منڈی سے واپسی پر فوری نہائیں اور کپڑے تبدیل کریں۔

• ذبح کے دوران جانور کے خون کو مکمل طور پر بہنے دیں۔

• گوشت دھوتے وقت دستانے استعمال کریں اور گوشت کو اچھی طرح پکائیں۔

عید کے پرمسرت موقع پر صحت و احتیاط کو نظر انداز نہ کریں۔ یہ چند بنیادی تدابیر نہ صرف آپ کو بلکہ آپ کے اہلِ خانہ کو بھی ایک مہلک بیماری سے محفوظ رکھ سکتی ہیں۔