انسدادِ دہشت گردی عدالت لاہور نے پاکستان تحریک انصاف کے سینئر رہنما اور سابق وزیر خارجہ شاہ محمود قریشی کے حق میں بڑا فیصلہ سناتے ہوئے انہیں 9 مئی کے دو اہم مقدمات میں بری کر دیا۔ عدالت نے ساتھ ہی سپرنٹنڈنٹ جیل کو باضابطہ مراسلہ جاری کرتے ہوئے ہدایت دی ہے کہ اگر ملزم کسی اور کیس میں مطلوب نہیں تو فوری طور پر رہائی یقینی بنائی جائے۔ یہ حکم انسدادِ دہشت گردی عدالت کے جج منظر علی گل نے جاری کیا۔ مقدمات کا تعلق گزشتہ سال 9 مئی کو پیش آنے والے واقعات سے ہے، جن میں راحت بیکری کے باہر جلاؤ گھیراؤ اور تھانہ شادمان میں ہنگامہ آرائی شامل تھے۔
عدالتی فیصلے کے بعد جیل حکام نے رہائی کے کاغذات کی تکمیل شروع کر دی ہے۔ پی ٹی آئی رہنماؤں اور کارکنوں نے اس فیصلے کو "انصاف کی فتح” قرار دیتے ہوئے خوشی کا اظہار کیا ہے۔ ادھر قانونی ماہرین کا کہنا ہے کہ یہ فیصلہ 9 مئی کے واقعات سے متعلق جاری عدالتی کارروائیوں پر اہم اثر ڈال سکتا ہے، کیونکہ اس سے دیگر زیر سماعت مقدمات کے فیصلوں پر بھی اثرانداز ہونے کے امکانات ہیں۔
Discussion about this post