سینیٹ کی خالی نشست ، ضمنی انتخاب کل ہوگا

الیکشن کمیشن آف پاکستان نے اعلان کیا ہے کہ شبلی فراز کی نااہلی کے باعث خالی ہونے والی سینیٹ کی نشست پر ضمنی انتخابات کل منعقد ہوں گے۔ کمیشن کے مطابق ووٹنگ کا عمل خیبرپختونخوا اسمبلی میں صبح 9 بجے سے شام 4 بجے تک جاری رہے گا۔ تحریک انصاف کی جانب سے خرم شہزاد امیدوار نامزد ہیں، جب کہ پاکستان پیپلزپارٹی کے نثار خان اور تین آزاد امیدوار بھی میدان میں موجود ہیں۔ واضح رہے کہ 5 اگست 2025 کو الیکشن کمیشن نے 9 مئی کے مقدمات میں سزائیں ہونے کے بعد سینیٹ میں قائد حزبِ اختلاف شبلی فراز، قومی اسمبلی میں قائد حزبِ اختلاف عمر ایوب سمیت 9 ارکانِ اسمبلی کو نااہل قرار دے کر ڈی سیٹ کردیا تھا۔ نااہل قرار دیے گئے ارکان میں ایک سینیٹر، پانچ ایم این ایز اور تین ایم پی ایز شامل تھے۔ اس سے قبل فیصل آباد کی انسدادِ دہشتگردی عدالت 9 مئی کے تین مقدمات میں عمر ایوب، شبلی فراز، زرتاج گل اور دیگر 196 رہنماؤں و کارکنوں کو 10 سال تک قید کی سزائیں سنا چکی ہے۔