کرشمہ کپور کے سابق شوہر سنجے کپور 53 برس کی عمر میں چل بسے

بولی وڈ اداکارہ کرشمہ کپور کے سابق شوہر اور معروف بھارتی صنعتکار سنجے کپور اچانک 53 برس کی عمر میں انتقال کر گئے۔ بھارتی میڈیا رپورٹس کے مطابق، سنجے کپور لندن کے نواحی علاقے میں واقع گارڈز پولو کلب میں پولو کھیلتے ہوئے اچانک زمین پر گر پڑے۔ فوری طور پر طبی امداد فراہم کی گئی، تاہم وہ جانبر نہ ہو سکے۔ ذرائع کے مطابق، انہیں دل کا دورہ پڑا تھا۔ سنجے کپور بھارت کی معروف آٹو موبائل کمپنی سونا کومسٹار کے چیئرمین تھے، جو عالمی سطح پر آٹو پارٹس فراہم کرنے والی صفِ اول کی کمپنیوں میں شمار کی جاتی ہے۔ وہ ایک اعلیٰ تعلیم یافتہ کاروباری شخصیت تھے، جنہوں نے ایم آئی ٹی اور ہارورڈ بزنس اسکول سے تعلیم حاصل کی تھی۔ ان کی کرشمہ کپور سے شادی 2003 میں ہوئی تھی، تاہم طویل اختلافات کے بعد دونوں 2016 میں علیحدہ ہو گئے۔ اس رشتے سے ان کے دو بچے ہیں،  بیٹی سمیرا اور بیٹا کیان۔ دلچسپ امر یہ ہے کہ وفات سے چند گھنٹے قبل سنجے کپور نے سوشل میڈیا پر احمد آباد میں پیش آنے والے طیارہ حادثے پر افسوس کا اظہار کیا تھا، جو اب وائرل ہو رہا ہے۔

Terrible news of the tragic Air India crash in Ahmedabad. My thoughts and prayers are with all the families affected. May they find strength in this difficult hour. 🙏 #planecrash

— Sunjay Kapur (@sunjaykapur) June 12, 2025

سنجے کپور کے انتقال کی خبر پر بھارتی فلم انڈسٹری سمیت کاروباری حلقوں میں گہرے دکھ اور افسوس کا اظہار کیا جا رہا ہے۔ کرشمہ کپور کے گھر کرینہ کپور، سیف علی خان، ملائکہ اروڑہ سمیت قریبی عزیز و اقارب اور دوست تعزیت کے لیے پہنچے۔ ابتدائی اطلاعات کے مطابق، سنجے کپور کی آخری رسومات لندن میں ادا کیے جانے کا امکان ہے، تاہم اہل خانہ کی جانب سے تاحال کوئی باضابطہ اعلان سامنے نہیں آیا۔