امریکہ میں پاکستان کے سفیر رضوان سعید شیخ نے عالمی برادری کو خبردار کیا ہے کہ بھارت کی قیادت جس انداز میں ہندوتوا کے انتہا پسندانہ نظریے کو ریاستی پالیسی میں ڈھال رہی ہے، وہ نہ صرف خطے کے امن و امان کے لیے تباہ کن ہے بلکہ عالمی اصولوں اور اقوام متحدہ کے چارٹر کی بھی صریح خلاف ورزی ہے۔امریکی اور بین الاقوامی میڈیا کے نمائندوں سے گفتگو کرتے ہوئے انہوں نے کہا کہ جنوبی ایشیا جیسے حساس خطے میں قیامِ امن کے لیے امریکہ نے ایک تعمیری کردار ادا کیا ہے، خاص طور پر پاکستان اور بھارت کے مابین حالیہ جنگ بندی میں امریکی قیادت کی کوششیں قابلِ قدر ہیں۔ صدر ڈونلڈ ٹرمپ کی ذاتی دلچسپی اور اعلانِ جنگ بندی نے نہ صرف ایک بڑے انسانی المیے کو روکا بلکہ ایک پرامن مستقبل کی امید بھی دی۔ سفیر رضوان نے کہا کہ پاکستان، ہمیشہ مسئلہ کشمیر کے پرامن، منصفانہ اور دیرپا حل کا خواہاں رہا ہے، جو اقوام متحدہ کی قراردادوں اور کشمیری عوام کی خواہشات کے مطابق ہو۔ انہوں نے زور دیا کہ یہ مسئلہ محض دو ممالک کے درمیان نہیں، بلکہ یہ ایک انسانی مسئلہ ہے، جہاں لاکھوں افراد کو ان کے بنیادی حقوق سے محروم رکھا گیا ہے۔ انہوں نے واضح کیا کہ امریکہ اور دیگر عالمی طاقتیں اگر اس مسئلے کو سنجیدگی سے لیں، تو جنوبی ایشیا میں پائیدار امن ممکن ہے۔ پاکستان، سفارتی ذرائع اور بین الاقوامی ضابطوں کے دائرے میں رہتے ہوئے مسئلہ کشمیر کے حل کے لیے پُرعزم ہے۔
سندھ طاس معاہدہ: بھارت کا رویہ اشتعال انگیز اور خلافِ ضابطہ
بات کو آگے بڑھاتے ہوئے سفیر رضوان سعید شیخ نے سندھ طاس معاہدے کے تناظر میں بھارت کے رویے کو نہایت غیر سنجیدہ، غیر قانونی اور بین الاقوامی اصولوں کے منافی قرار دیا۔ ان کا کہنا تھا کہ پانی جیسے بنیادی انسانی حق کو سیاسی ہتھیار کے طور پر استعمال کرنا نہ صرف قابلِ مذمت ہے بلکہ خطے کے لیے انتہائی خطرناک بھی ہے۔انہوں نے خبردار کیا کہ بھارت کی جانب سے دریاؤں کا پانی روکنا کسی بھی طور پر قابل قبول نہیں۔ 25 کروڑ سے زائد پاکستانی عوام کا پانی روکنے کی کوشش کھلا اعلانِ جنگ تصور کیا جائے گا۔ بین الاقوامی برادری اس عمل کی حمایت نہیں کرے گی کیونکہ یہ انسانیت کے خلاف ایک ہتھیار ہے۔
اکھنڈ بھارت کا بیانیہ: توسیع پسندی اور جغرافیائی جارحیت
سفیرِ پاکستان نے بھارتی پارلیمنٹ میں اکھنڈ بھارت کے نقشے کی موجودگی پر شدید تشویش کا اظہار کرتے ہوئے کہا کہ یہ اقدام بھارت کی تسلط پسندانہ ذہنیت اور خطے پر بالادستی کے مذموم عزائم کی عکاسی کرتا ہے۔ اس سوچ کا فروغ خطے کے امن کو سبوتاژ کرنے کی ایک خطرناک سازش ہے۔ انہوں نے کہا کہ بھارتی قیادت کا بار بار پاکستان کو اپنے داخلی سیاسی مقاصد کے لیے استعمال کرنا اور مذہبی شدت پسندی کو ہوا دینا دراصل ایک فاشسٹ سوچ کو فروغ دینا ہے، جس کا مقصد عوامی توجہ کو اصل مسائل سے ہٹانا اور انتخابی ناکامیوں پر پردہ ڈالنا ہے۔
بلوچستان میں بھارتی مداخلت: ناقابلِ تردید حقائق
اپنے بیان کے آخر میں سفیر رضوان سعید شیخ نے بلوچستان میں بھارت کے منفی کردار کو بے نقاب کرتے ہوئے کہا کہ وہاں ریاست مخالف سرگرمیوں میں بھارتی خفیہ اداروں کی شمولیت کسی سے ڈھکی چھپی نہیں۔ انہوں نے کہا کہ بے گناہ بچوں، خواتین اور عام شہریوں پر ہونے والے مظالم، اور ان کے پس پردہ عناصر، دراصل انسانیت کے سب سے بڑے دشمن ہیں۔انہوں نے عالمی ضمیر کو جھنجھوڑتے ہوئے کہا کہ وقت آ چکا ہے کہ بھارت کو اس کے شدت پسندانہ اور تخریبی عزائم کے لیے عالمی سطح پر جوابدہ بنایا جائے۔
Discussion about this post