آج انٹر نیٹ کی سروس غیرفعال ہونے کی جھوٹی خبر ہے، پی ٹی اے

پاکستان ٹیلی کمیونیکیشن اتھارٹی نے عوام کو یقین دہانی کراتے ہوئے واضح کیا ہے کہ 15 جنوری کو ملک بھر میں انٹرنیٹ سروسز بلا تعطل اور مکمل طور پر فعال رہیں گی۔ پی ٹی اے کے مطابق سوشل میڈیا اور دیگر ذرائع پر انٹرنیٹ بندش یا تعطل سے متعلق گردش کرنے والی خبریں حقیقت پر مبنی نہیں اور محض افواہیں ہیں۔ اتھارٹی کی جانب سے جاری کردہ اعلامیے میں کہا گیا ہے کہ ملک میں انٹرنیٹ سروسز معمول کے مطابق کام کرتی رہیں گی، جبکہ روٹین سب میرین کیبل کی مرمت کا عمل پہلے سے طے شدہ شیڈول کے تحت جاری ہے۔ پی ٹی اے نے واضح کیا کہ اس مرمتی عمل کے باعث صارفین کو کسی قسم کی رکاوٹ یا سروس میں کمی کا سامنا نہیں کرنا پڑے گا۔ اعلامیے میں مزید بتایا گیا ہے کہ انٹرنیٹ سروسز کے تسلسل اور معیار کو برقرار رکھنے کے لیے تمام نیٹ ورکس کی مسلسل نگرانی کی جا رہی ہے، تاکہ صارفین کو ہموار اور مستحکم کنیکٹیویٹی فراہم کی جا سکے۔ پی ٹی اے نے عوام سے اپیل کی ہے کہ غیر مصدقہ خبروں پر کان نہ دھریں اور مستند معلومات کے لیے صرف سرکاری ذرائع پر اعتماد کریں۔