پی ایس ایل کے بقیہ معرکے اب دبئی میں ہوں گے

پاکستان کرکٹ بورڈ (پی سی بی) نے اعلان کیا ہے کہ پاکستان سپر لیگ (پی ایس ایل) سیزن 10 کے باقی تمام میچز اب متحدہ عرب امارات کے دلکش میدانوں میں کھیلے جائیں گے۔ یہ فیصلہ حالیہ کشیدہ حالات کے پیشِ نظر کیا گیا ہے تاکہ کھلاڑیوں، آفیشلز اور شائقین کی سلامتی کو یقینی بنایا جا سکے۔  پی سی بی کی جانب سے جاری بیان کے مطابق، کراچی کنگز بمقابلہ پشاور زلمی، پشاور زلمی بمقابلہ لاہور قلندرز، اسلام آباد یونائیٹڈ بمقابلہ کراچی کنگز، ملتان سلطانز بمقابلہ کوئٹہ گلیڈی ایٹرز، کوالیفائر، ایلیمی نیٹر ون، ایلیمی نیٹر ٹو اور فائنل جیسے سنسنی خیز مقابلوں کو اب دبئی میں ایک نئے شیڈول کے تحت منعقد کیا جائے گا۔

مکمل شیڈول آئندہ چند روز میں جاری کر دیا جائے گا۔یہ فیصلہ اُس وقت سامنے آیا جب بدھ کی شب پشاور زلمی اور کراچی کنگز کے درمیان راولپنڈی میں شیڈول 27واں میچ سیکیورٹی خدشات کی وجہ سے مؤخر کر دیا گیا۔ ذرائع کے مطابق، بھارتی ڈرون حملوں کے بعد راولپنڈی کرکٹ اسٹیڈیم کے قریب بھی ایک ڈرون گرا، جس نے سیکیورٹی اداروں کو چوکنا کر دیا۔ اب تک پی ایس ایل میں 26 میچز کھیلے جا چکے ہیں۔ نو مئی کو لاہور قلندرز اور پشاور زلمی، جب کہ 10 مئی کو اسلام آباد یونائیٹڈ اور کراچی کنگز کے درمیان مقابلے بھی راولپنڈی میں ہونا تھے، جن کے شیڈول میں تبدیلی متوقع ہے۔ ادھر، پی ایس ایل کے بقیہ میچز کی منتقلی کے سلسلے میں غیرملکی کھلاڑی اور آفیشلز آج شام دبئی روانہ ہوں گے۔ ذرائع کے مطابق، انہیں ایک خصوصی پرواز کے ذریعے روانہ کیا جا رہا ہے، جبکہ پاکستانی کھلاڑیوں کا دوسرا دستہ بھی جلد ہی دبئی پہنچے گا۔