پاکستان اور چین آہنی بھائی ہیں

وزیراعظم پاکستان شہباز شریف نے چین کے نئے سال کے پرمسرت موقع پر ایک گرم جوش، دل کو چھو لینے والا تہنیتی پیغام جاری کیا ہے جو پاک چین دوستی کی گہرائی اور خوبصورتی کو ایک بار پھر دنیا کے سامنے لا کھڑا کرتا ہے۔ انہوں نے اپنے پیغام میں فرمایا کہ پاکستان اور چین اہنی بھائی ہیں. ایسی مضبوطی اور اعتماد کی علامت جو وقت کی ہر آزمائش میں مزید پختہ ہوتی جاتی ہے۔ دونوں ممالک کے درمیان قائم ہر موسم کی اسٹریٹیجک شراکت داری نہ صرف دوستی کی بنیاد ہے بلکہ مشترکہ خوابوں، ترقی اور خوشحالی کی ضمانت بھی ہے۔ چین کے روایتی کیلنڈر میں اس سال کا علامتی جانور گھوڑا ہےجو توانائی، ہمت، تیز رفتاری اور بے پناہ جوش کی زندہ تصویر ہے۔ وزیراعظم نے اس خوبصورت علامت کو اپنے الفاظ میں اس طرح سمیٹا کہ یہ اقدار ہماری مشترکہ ترقی کی آئینہ دار ہیں۔ گھوڑے کی طرح ہی پاکستان اور چین مل کر آگے بڑھ رہے ہیں . شہباز شریف نے اپنے پیغام میں امن، خوشحالی، ترقی اور علاقائی روابط کو مزید مضبوط کرنے کے عزم کا اعادہ کیا۔ انہوں نے امید کا اظہار کیا کہ یہ نیا سال ہماری لا زوال دوستی کو نئی بلندیوں تک لے جائے گا، نئے مواقع لائے گا اور دونوں قوموں کے درمیان محبت اور تعاون کے نئے باب کھولے گا۔ سب سے خوبصورت بات یہ کہ وزیراعظم نے پوری پاکستانی قوم کی طرف سے چینی بھائیوں کی صحت، خوشحالی، کامیابی اور مستقل ترقی کے لیے دعائیں بھیجیں۔ یہ الفاظ محض رسم نہیں. یہ دل کی گہرائیوں سے نکلنے والی آواز ہیں جو دونوں ممالک کے درمیان پائے جانے والے بے پایاں اعتماد اور جذبے کی گواہی دیتے ہیں۔