ٹرمپ کو قابو میں رکھنے کا فن صرف شہباز شریف کو آتا ہے، برطانوی اخبار

برطانوی اخبار دی گارڈین نے اپنی تازہ رپورٹ میں ایک دلچسپ انکشاف کرتے ہوئے کہا ہے کہ امریکی صدر ڈونلڈ ٹرمپ کے غیر متوقع رویے کو قابو میں رکھنے والا واحد رہنما پاکستانی وزیراعظم شہباز شریف ہیں۔رپورٹ کے مطابق، شرم الشیخ میں منعقدہ غزہ امن سربراہ اجلاس کے دوران ٹرمپ کے غیر روایتی طرزِ عمل نے کئی عالمی رہنماؤں کو مشکل میں ڈال دیا۔ کبھی انہوں نے اطالوی وزیراعظم کے حسن کی تعریف کی، تو کبھی برطانوی وزیراعظم کئیر اسٹارمر کو بلا کر اچانک مائیک خود سنبھال لیا۔اتنا ہی نہیں، انہوں نے کینیڈا کے وزیراعظم کو مذاق میں “گورنر” کہہ کر مخاطب کیا، جس پر ماحول ایک لمحے کو سنجیدہ ہو گیا۔

تاہم، دی گارڈین کے مطابق، واحد رہنما جنہوں نے ٹرمپ کے رویے کو مؤدبانہ مگر مؤثر انداز میں سنبھالا، وہ وزیراعظم شہباز شریف تھے۔ جب شہباز شریف تقریر کے لیے اسٹیج پر آئے تو انہوں نے باتوں ہی باتوں میں ماحول کو خوشگوار بنا دیا۔رپورٹ کے مطابق، جب ٹرمپ دوبارہ اسٹیج کی طرف بڑھنے لگے تو شہباز شریف نے خوش اخلاقی سے انہیں روکا اور اپنی گفتگو مکمل کی، جس پر ٹرمپ بھی مسکرا دیے اور نشست پر واپس جا بیٹھے۔

اخبار کا کہنا ہے کہ ٹرمپ کی تاخیر، بے ساختہ تبصروں اور غیر رسمی انداز کے باوجود، شہباز شریف نے سفارتی مہارت اور تحمل کا شاندار مظاہرہ کرتے ہوئے امریکی صدر کو نہ صرف پرسکون رکھا بلکہ پورے اجلاس کا ماحول بھی متوازن بنا دیا۔دی گارڈین نے لکھا کہ

“شہباز شریف نے نہ صرف ٹرمپ کو سنبھالا، بلکہ سفارتی محفل میں پاکستانی قیادت کی سنجیدگی اور موقع کی نزاکت کو سمجھنے کی صلاحیت کا ثبوت بھی دیا۔”