کراچی میں پاکستان انٹرنیشنل فلم فیسٹیول 2025 کا شاندار آغاز

کراچی فلم سوسائٹی (KFS) اور پاکستان انٹرنیشنل فلم فیسٹیول 2025 کے اشتراک سے اور انٹلیکچوئل پراپرٹی آرگنائزیشن (IPO) پاکستان کے تعاون سے ورلڈ انٹلیکچوئل پراپرٹی ڈے کے موقع پر چار روزہ فلمی و فکری تقریبات کا باقاعدہ آغاز ہو گیا۔ افتتاحی تقریب کراچی فلم سوسائٹی میں منعقد ہوئی، جہاں انٹلیکچوئل پراپرٹی، جدید سنیما، اور ثقافتی داستان گوئی کو خراجِ تحسین پیش کیا گیا۔ تقریب میں میڈیا انڈسٹری کے ماہرین، تعلیمی اداروں کے نمائندے، فنکار، فلم ساز، کارپوریٹ رہنما، اور یونیورسٹی طلباء بڑی تعداد میں شریک ہوئے۔ تقریب کے مہمانِ خصوصی سینئر صوبائی وزیر شرجیل انعام میمن تھے، جب کہ مہمانِ اعزازی میڈیا انڈسٹری کی ممتاز شخصیت سلطانہ صدیقی تھیں۔

تخلیقی حقوق، نئی ٹیکنالوجی اور نوجوانوں کا کردار مرکزِ توجہ

افتتاحی سیشن میں IPO پاکستان کے چیئرمین اور سابق سفیر فرخ امل نے خطبۂ استقبالیہ پیش کیا۔ انہوں نے کہا:

"انٹلیکچوئل پراپرٹی نہ صرف تخلیقی صلاحیتوں کی حفاظت کا ذریعہ ہے بلکہ قومی اقتصادی ترقی کا ایک اہم ستون بھی ہے۔”

انہوں نے نوجوانوں پر زور دیا کہ وہ اپنی فلموں، موسیقی اور تخلیقات کو نہ صرف پہچانیں بلکہ ان کے IP حقوق کے تحفظ کو اپنی ترجیح بنائیں۔
"اپنی موسیقی جانیں، اپنی فلم کو جانیں، اپنے حقوق کو محفوظ کریں — یہ آپ کا اثاثہ ہے، اس کے مالک بنیں!”

تقریب میں شریک میزبان اور کومپ (COMP) کے بانی امیر ریاض، اور دیگر ممتاز شخصیات نے بھی اظہارِ خیال کیا۔

سلطانہ صدیقی نے میڈیا کے اس کردار پر روشنی ڈالی کہ وہ اصل تخلیقات کی تشہیر اور تحفظ میں کلیدی کردار ادا کر سکتا ہے۔ انہوں نے حکومت سے اس ضمن میں مزید تعاون کی اپیل کی۔

ٹیکنالوجی، مصنوعی ذہانت اور موسیقی: ایک متحرک مکالمہ

فیسٹیول کے پہلے دن کے سیشنز میں جدید ٹیکنالوجی، AI، اور انٹلیکچوئل پراپرٹی کے باہمی تعلق پر مکالمے ہوئے۔

پہلے سیشن کی میزبانی ماہر بصری فنون مہوش حسنین نے کی۔ پینل میں ڈاکٹر کاشف لئیق، محمد جواد پراچہ، طفیل چنا شامل تھے۔
موضوع تھا:

"ٹیکنالوجی اور مصنوعی ذہانت کے تناظر میں موسیقی، اختراع، اور IP حقوق کی اہمیت”

دوسرے سیشن کا موضوع تھا:

"نوجوان، موسیقی اور جدت — کس طرح IP فنکاروں کو تخلیقی و مالی خودمختاری دیتی ہے؟”

اس سیشن میں ارشد محمود، بابر شیخ، امنیا افتخار، تیمور اسلم، اور محمد علی شہکی نے شرکت کی۔ تقریب کا اختتام ناپا ٹیم، سیف سمیجو اور بینڈ کی شاندار لائیو میوزک پرفارمنس پر ہوا، جس نے شرکاء کو محظوظ کر دیا۔ اس کے بعد کومپ کے سی او او تیمور اسلم نے اظہارِ تشکر کیا، جبکہ سید نصر اللہ  نے اختتامی کلمات ادا کیے اور پاکستان میں تخلیقی صنعتوں کے فروغ کے لیے مسلسل کوششوں کا یقین دلایا۔

تقریب کے آخر میں سوینیئرز کی تقسیم اور پرتکلف ظہرانے کا اہتمام بھی کیا گیا۔

فیسٹیول کے آئندہ دنوں میں کیا ہوگا؟

فیسٹیول کے بقیہ تین دنوں میں

• جرمن فلموں کی خصوصی نمائش

• ابھرتے فلم سازوں کے پراجیکٹس

• بین الاقوامی کہانیوں کی ترجمانی
  جیسے دلچسپ پروگرامز شامل ہوں گے۔

•