پاکستان انٹرنیشنل ایئرلائن (پی آئی اے) نے برطانیہ کے لیے اپنے فضائی آپریشن میں توسیع کرتے ہوئے اسلام آباد سے لندن کے لیے پروازیں شروع کرنے کا اعلان کر دیا ہے۔پی آئی اے کے ترجمان کے مطابق 29 مارچ سے اسلام آباد سے لندن کے لیے ہفتہ وار چار پروازیں آپریٹ کی جائیں گی، جو ہیتھرو ایئرپورٹ کے جدید ترین ٹرمینل 4 سے روانہ ہوں گی۔ یہ پروازیں چھ سال کے طویل وقفے کے بعد بحال کی جا رہی ہیں، جسے قومی ایئر لائن کے لیے ایک اہم پیش رفت قرار دیا جا رہا ہے۔ترجمان کا کہنا ہے کہ لندن پی آئی اے کا پہلا بین الاقوامی اور سب سے زیادہ مقبول روٹ رہا ہے، جس کی بحالی مسافروں کے لیے خوش آئند خبر ہے۔ انہوں نے مزید بتایا کہ قومی ایئر لائن پہلے ہی مانچسٹر کے لیے ہفتہ وار تین پروازیں آپریٹ کر رہی ہے، جبکہ اسلام آباد سے لندن کے لیے پروازوں کے آغاز سے برطانیہ میں مقیم پاکستانیوں کو سفری سہولت میں نمایاں بہتری ملے گی۔
Discussion about this post