پاکستان کا پہلا انٹرنیشنل ڈرائیونگ لائسنس کیاسک لاہور ایئرپورٹ پر قائم

پاکستان میں شہری سہولت کے ایک نئے باب کا آغاز ہو چکا ہے، جہاں لاہور کے علامہ اقبال انٹرنیشنل ایئرپورٹ پر ملک کا پہلا انٹرنیشنل ڈرائیونگ لائسنس کیاسک قائم کر دیا گیا ہے۔ اس جدید سہولت کا افتتاح چیف ٹریفک آفیسر لاہور ڈاکٹر محمد اطہر وحید نے کیا۔ افتتاحی تقریب کے موقع پر گفتگو کرتے ہوئے سی ٹی او لاہور کا کہنا تھا کہ یہ اقدام اوورسیز پاکستانیوں اور بیرون ملک سفر کرنے والے افراد کے لیے ایک بڑی سہولت ثابت ہوگا۔ اب شہری بیرون ملک روانگی سے قبل صرف پانچ منٹ کے اندر اپنا انٹرنیشنل ڈرائیونگ لائسنس حاصل کر سکتے ہیں، جو انہیں 132 ممالک میں گاڑی چلانے کی قانونی اجازت فراہم کرتا ہے۔

پاکستان کا پہلا ٹریفک کیاسک جو کسی بھی انٹرنیشنل ائیرپورٹ پر شہریوں کی سہولت کیلئے لگایا گیا ھے۔ سی ٹی او لاھور ڈاکٹر محمد اطہر وحید نے لاھور ائیرپورٹ پر افتتاح کر دیا۔ شہری صرف 5 منٹ میں اپنا انٹرنیشنل ڈرائیونگ لائسنس حاصل کر سکتے ھیں جس کی بدولت وہ 132 ممالک میں گاڑی چلا سکتے… pic.twitter.com/7q1OQRnDdO

— Punjab Police Official (@OfficialDPRPP) June 30, 2025

ڈاکٹر اطہر وحید نے مزید کہا کہ یہ پہلا موقع ہے کہ پاکستان کے کسی انٹرنیشنل ایئرپورٹ پر ایسا ٹریفک کیاسک نصب کیا گیا ہے، جو براہ راست شہریوں کی سہولت کے لیے کام کرے گا۔ ان کے مطابق، یہ جدید نظام شہریوں کے وقت اور محنت کی بچت کے ساتھ ساتھ ملک میں ڈیجیٹلائزیشن کے فروغ کی جانب ایک عملی قدم ہے۔سی ٹی او لاہور نے اپنے خصوصی پیغام میں کہا کہ:

"ہماری کوشش ہے کہ شہریوں کو جدید، تیز رفتار اور قابلِ اعتماد سہولیات فراہم کی جائیں، تاکہ وہ بین الاقوامی سفر کے لیے مکمل تیاری کے ساتھ روانہ ہو سکیں۔”

یہ کیاسک اس بات کی علامت ہے کہ پاکستان تیزی سے جدید ٹیکنالوجی اور عوامی سہولیات کی بہتری کی طرف بڑھ رہا ہے، جہاں معمولی نوعیت کے اہم کام بھی فوری اور سہل انداز میں انجام دیے جا سکیں۔