پاک بحریہ نے شمالی بحیرۂ عرب میں فضا سے لاحق خطرات سے نمٹنے کی بھرپور صلاحیت کا عملی مظاہرہ کرتے ہوئے سطح سے فضا تک مار کرنے والے میزائل کی کامیاب لائیو ویپن فائرنگ انجام دی، جس کے ذریعے اپنی آپریشنل تیاری اور جنگی مہارت کی واضح توثیق کر دی۔
پاک بحریہ کے شعبۂ تعلقاتِ عامہ کے مطابق اس مشق کے دوران FM-90(N) ER میزائل کا کامیاب استعمال کیا گیا، جو جدید فضائی اہداف کو نشانہ بنانے کی بھرپور صلاحیت رکھتا ہے۔ اس لائیو فائرنگ کا مقصد بحریہ کی دفاعی تیاری، ردِعمل کی رفتار اور جدید جنگی تقاضوں سے ہم آہنگ صلاحیتوں کا عملی جائزہ لینا تھا۔ فائر پاور کے اس شاندار مظاہرے کے دوران پاک بحریہ کے جہاز نے نہایت تیز رفتار اور انتہائی مینوریبل فضائی اہداف کو کامیابی کے ساتھ نشانہ بنا کر اپنی پیشہ ورانہ مہارت کا ثبوت دیا۔ یہ کامیاب فائرنگ اس بات کی عکاس ہے کہ پاک بحریہ ہر قسم کے فضائی خطرات سے نمٹنے کے لیے مکمل طور پر مستعد اور تیار ہے۔ بیان میں کہا گیا کہ اس مشق نے ایک بار پھر پاک بحریہ کی جنگی صلاحیت، جدید ٹیکنالوجی کے مؤثر استعمال اور اہلکاروں کی اعلیٰ تربیت کو نمایاں کر دیا ہے۔ لائیو فائرنگ کا مشاہدہ کمانڈر پاکستان فلیٹ ریئر ایڈمرل عبدالمنیب نے فلیٹ یونٹ کے ہمراہ کیا۔ اس موقع پر کمانڈر پاکستان فلیٹ نے مشق میں حصہ لینے والے افسران اور جوانوں کی پیشہ ورانہ صلاحیت، نظم و ضبط، عزم اور شاندار کارکردگی کو سراہا۔ انہوں نے اس عزم کا اعادہ کیا کہ پاک بحریہ ہر قیمت پر پاکستان کے سمندری دفاع کو یقینی بنانے اور قومی بحری مفادات کے تحفظ کے لیے ہمہ وقت تیار ہے۔
Discussion about this post