ایک اور امریکی لڑکی کو نوجوان کا پیار پاکستان کھینچ لایا

یہ واقعہ سوشل میڈیا کی طاقت اور سرحدوں سے ماورا محبت کی ایک اور حیرت انگیز مثال بن گیا ہے جہاں امریکی ریاست شکاگو سے تعلق رکھنے والی خاتون "مینڈی” پاکستان کے نوجوان ساجد زیب خان کی محبت میں کھنچی چلی آئیں۔ فیس بک پر برسوں پہلے شروع ہونے والی یہ دوستی وقت کے ساتھ ساتھ گہری محبت میں بدل گئی، جس کے بعد مینڈی نے پاکستان آنے اور نکاح کا فیصلہ کر لیا۔ اسلام آباد ایئرپورٹ پر مینڈی کا پرتپاک استقبال کیا گیا، جس کی ویڈیو سوشل میڈیا پر خوب وائرل ہو رہی ہے۔ نوجوان ساجد زیب کے مطابق، مینڈی نے شادی کی خواہش ظاہر کی تھی اور پھر دونوں نے اپنے خاندانوں کو اعتماد میں لے کر باقاعدہ نکاح کا ارادہ کر لیا۔ وہ جلد ہی اپر دیر میں اپنے خاندان کی موجودگی میں اسلامی طریقے اور مقامی رسم و رواج کے مطابق نکاح کریں گے۔ مینڈی نے پاکستان پہنچ کر اپنے تاثرات کا اظہار کرتے ہوئے کہا کہ یہ ملک نہ صرف خوبصورت بلکہ انتہائی پُرامن بھی ہے۔ ان کا کہنا تھا کہ پاکستان آکر انہیں بہت خوشی ہوئی ہے۔ یہ پہلا موقع نہیں کہ کسی غیر ملکی خاتون نے پاکستانی نوجوان کی محبت میں اپنا وطن چھوڑا ہو۔ رواں ماہ ہی امریکی ریاست ساؤتھ کیرولائنا کی 27 سالہ کیرنشا گریس جھنگ پہنچ کر 29 سالہ نعیم الحسن سے شادی کر چکی ہیں۔ انہوں نے اسلام قبول کرکے "کنیز عائشہ” نام اختیار کیا اور مقامی عدالت میں باقاعدہ نکاح کا اندراج کروایا۔ تاہم، سوشل میڈیا پر جنم لینے والی یہ کہانیاں ہمیشہ خوشگوار انجام تک نہیں پہنچتیں۔ اس سے قبل ایک امریکی خاتون اونیجا اینڈریو رابنسن بھی پاکستان آئیں مگر انہیں ناکامی کا سامنا کرنا پڑا۔ اسی طرح تیونس کی 19 سالہ سندہ ایاری کی کراچی کے نوجوان محمد عامر سے شادی بھی انجام کار طلاق پر منتج ہوئی۔ شادی کے بعد اختلافات بڑھنے پر عامر نے سندہ کو طلاق دے دی اور وہ پاکستان میں نہ صرف تنہا رہ گئیں بلکہ ذہنی دباؤ میں آکر خودکشی کی کوشش بھی کی، جس کے بعد انہیں تیونس واپس بھیج دیا گیا۔