پاک بحریہ کی کمیشننگ پریڈ میں فیلڈ مارشل سید عاصم منیر کی خصوصی شرکت

پاکستان نیول اکیڈمی پی این ایس رہبر میں پاک بحریہ کے 123ویں مڈ شپ مین اور 31ویں شارٹ سروس کمیشن کورس کی شاندار کمیشننگ پریڈ کا انعقاد کیا گیا، جس میں چیف آف آرمی اسٹاف فیلڈ مارشل سید عاصم منیر مہمانِ خصوصی کی حیثیت سے شریک ہوئے۔ پریڈ کے آغاز پر فیلڈ مارشل عاصم منیر کو پاک بحریہ کے چاق و چوبند دستے نے سلامی پیش کی۔ انہوں نے پریڈ کا معائنہ کیا اور فارغ التحصیل کیڈٹس کی پیشہ ورانہ صلاحیتوں کو سراہا۔ اس پر وقار تقریب میں پاک بحریہ کے اعلیٰ افسران، غیر ملکی سفارت کاروں، اور دیگر معزز مہمانوں نے شرکت کی۔ پریڈ کے دوران فارغ التحصیل کیڈٹس سے حب الوطنی اور اپنی پیشہ ورانہ ذمہ داریوں کی ادائیگی کا حلف لیا گیا۔ مہمانِ خصوصی فیلڈ مارشل سید عاصم منیر نے نمایاں کارکردگی کا مظاہرہ کرنے والے کیڈٹس میں انعامات تقسیم کیے۔ کیڈٹ عبدالرحمٰن کو شاندار کارکردگی پر اعزازی شمشیر سے نوازا گیا، جو نوجوانوں کے لیے ایک روشن مثال ہے۔ اپنے خطاب میں فیلڈ مارشل سید عاصم منیر نے کہا کہ پاکستان کی بحری سرحدوں کا تحفظ، ملکی خودمختاری اور قومی مفادات کی نگہبانی پاک بحریہ کی اولین ترجیح ہے۔ انہوں نے نوجوان افسروں کو وطن عزیز کے دفاع، دیانت، جذبۂ قربانی اور پیشہ ورانہ وقار سے اپنی ذمہ داریاں نبھانے کی تلقین کی۔یہ تقریب نہ صرف بحری افسران کے کیریئر کی اہم سنگ میل تھی بلکہ یہ قوم کے اعتماد اور مسلح افواج کی مشترکہ ہم آہنگی کا مظہر بھی بنی۔ فیلڈ مارشل کی موجودگی نے اس لمحے کو مزید باوقار بنا دیا۔