نارتھ امریکہ میں پاکستانی نژاد معالجین کی نمائندہ تنظیم اے پی پی این اے کے اعلان کے مطابق ڈاکٹر راؤ کامران علی کو ٹیکساس کے گورنر گریگ ایبٹ نے ایک بار پھر ٹیکساس فزیشن اسسٹنٹ بورڈ میں شامل کر لیا ہے۔ ان کی اس نئی مدت کی باقاعدہ توثیق ٹیکساس سینیٹ نے کی ہے، اور یہ یکم فروری 2031 تک مؤثر رہے گی۔ یہ تقرری نہ صرف ڈاکٹر علی کی پیشہ ورانہ خدمات کا اعتراف ہے بلکہ اس بات کا ثبوت بھی ہے کہ پاکستانی نژاد معالجین امریکی نظامِ صحت میں کلیدی قیادت کی ذمہ داریاں نبھانے کے قابل اور مستحق ہیں۔ ڈاکٹر راؤ کامران علی ڈیلس، ٹیکساس میں مقیم ہیں اور ڈبل بورڈ سرٹیفائیڈ درد کے ماہر ہونے کے ساتھ ساتھ پریمیر پین اسپلیشٹس کے بانی اور سی ای او بھی ہیں۔
انہوں نے صحت کی معیاری سہولیات کی فراہمی، مریضوں کے حقوق کے تحفظ اور نوجوان معالجین کی تربیت کے لیے نمایاں خدمات انجام دی ہیں۔ ڈاکٹر علی نہ صرف اے پی پی این اے کے مقاصد یعنی معیاری طبی خدمات، طبی تعلیم اور انسانیت کی خدمتکے علمبردار ہیں بلکہ وہ پاکستانی امریکی کمیونٹی کا فخر بھی ہیں۔ ٹیکساس فزیشن اسسٹنٹ بورڈ ریاست میں فزیشن اسسٹنٹس کے لائسنس، ضوابط، اور ان کے پیشہ ورانہ معیار کے تعین کا ذمہ دار ادارہ ہے۔ ڈاکٹر علی کی دوبارہ تقرری اس بات کی دلیل ہے کہ وہ نہ صرف صحت عامہ میں بہتری کے لیے پرعزم ہیں بلکہ ایک شفاف اور مؤثر طبی نظام کے لیے بھی سرگرم عمل ہیں یہ ڈاکٹر علی کی بورڈ میں دوسری مدت ہے، جو ٹیکساس کی ریاستی قیادت کے ان پر اعتماد اور ان کی صلاحیتوں کا منہ بولتا ثبوت ہے۔ ان کی موجودگی نہ صرف پالیسی سازی میں تنوع کو فروغ دے گی بلکہ پاکستانی نژاد کمیونٹی کی مؤثر نمائندگی بھی ممکن بنائے گی۔
Discussion about this post