پاک امریکا 13 ویں انسداد دہشت گردی مشترکہ فوجی مشقوں کا آغاز

پاک فوج اور امریکی افواج کے درمیان 13ویں مشترکہ فوجی مشقیں Inspired Gambit-2026 باضابطہ طور پر شروع ہو گئی ہیں۔

آئی ایس پی آر کے مطابق یہ انسداد دہشت گردی کی مشقیں 9 جنوری سے نیشنل کاؤنٹر ٹیررازم سینٹر پبی میں جاری ہیں اور دو ہفتوں تک جاری رہیں گی۔ مشقوں میں پاکستان اور امریکہ کے تربیت یافتہ فوجی دستے حصہ لے رہے ہیں، اور یہ کاؤنٹر ٹیررازم کے جدید طریقوں اور حکمت عملیوں پر مرکوز ہیں۔ افتتاحی تقریب میں دونوں ممالک کے اعلیٰ حکام نے شرکت کی، اور مشقوں کا بنیادی مقصد انسداد دہشت گردی کے تجربات کے تبادلے کے ذریعے باہمی افہام و تفہیم اور تعاون کو فروغ دینا بتایا گیا۔ ساتھ ہی، موثر آپریشنز کے لیے ضروری حکمت عملی، تکنیک اور طریقہ کار کو مزید بہتر بنانے پر بھی زور دیا جا رہا ہے۔

ترجمان پاک فوج نے کہا کہ مشترکہ مشقوں میں شہری جنگ اور نشانہ بازی کی مہارتوں کے ساتھ ساتھ ایک دوسرے کے آپریشنل نظریات اور بہترین طریقوں کو سمجھنے پر بھی توجہ دی جا رہی ہے۔ اس طرح کی تربیتی مشقیں ابھرتے ہوئے سیکیورٹی چیلنجز سے نمٹنے، پیشہ ورانہ فوجی معیار کو مضبوط کرنے اور انسداد دہشت گردی کے پیچیدہ ماحول میں کام کرنے کی صلاحیت بڑھانے میں اہم کردار ادا کرتی ہیں۔

بیان میں مزید کہا گیا کہ Inspired Gambit-2026 پاکستان اور امریکہ کی امن اور استحکام کے لیے مسلسل مشترکہ عزم کی عکاسی کرتی ہیں۔