صنعتی و زرعی پیداوار بڑھانے کیلئے جامع حکمتِ عملی کی ہدایت

وزیراعظم شہباز شریف نے ملکی صنعتی پیداوار میں اضافے اور بجلی کے مؤثر استعمال کو یقینی بنانے کیلئے پاور ڈویژن کو جامع، قابلِ عمل اور نتیجہ خیز پالیسی سفارشات مرتب کرنے کی ہدایت کی ہے۔ وزیراعظم کی زیرِ صدارت اسلام آباد میں منعقدہ اجلاس میں پاور ڈویژن کی جانب سے بجلی کی پیداوار، اصلاحاتی ایجنڈے اور ممکنہ پالیسی فریم ورک پر بریفنگ دی گئی۔ وزیراعظم نے ہدایت دی کہ بجلی کے جامع و مؤثر استعمال کے ذریعے نہ صرف صنعتی کارکردگی بہتر بنائی جائے بلکہ زرعی شعبے میں بھی پیداوار بڑھانے کے لیے واضح روڈ میپ تیار کیا جائے۔ وزیراعظم نے کہا کہ زراعت اور صنعت ملکی معیشت کی بنیاد ہیں، ان شعبوں کو سہولت دینا حکومت کی اولین ترجیح ہے۔ انہوں نے سرمایہ کاروں اور صنعت کاروں کے لیے آسانیاں پیدا کرنے سے متعلق بھی پاور ڈویژن کو خصوصی تجاویز دینے کی ہدایت کی۔ اجلاس میں وفاقی وزیر توانائی سردار اویس خان لغاری، وزیر اطلاعات عطاء اللہ تارڑ، وفاقی وزیر اقتصادی امور احد چیمہ، مشیر برائے صنعت ہارون اختر سمیت متعلقہ اعلیٰ حکام شریک تھے۔