خیبر پختونخوا: سیکیورٹی فورسز کا آپریشن، 2 خوارج دہشتگرد ہلاک

خیبر پختونخوا کے ضلع بنوں کے مغل کوٹ سیکٹر میں سیکیورٹی فورسز نے خفیہ اطلاعات پر مبنی ایک نہایت کامیاب کارروائی کرتے ہوئے فتنۂ خوارج سے تعلق رکھنے والے دو شدت پسندوں کا خاتمہ کر دیا۔ باخبر ذرائع کے مطابق یہ انٹیلی جنس بیسڈ آپریشن طویل نگرانی اور ٹھوس معلومات کے بعد ترتیب دیا گیا، جس میں خوارج کے طارق کچھی گروہ کا نیٹ ورک فیصلہ کن انداز میں نشانہ بنا۔ کارروائی کے دوران تنظیم کا سرغنہ طارق کچھی اور اس کا اہم ساتھی حکیم اللّٰہ عرف “ٹائیگر” ہلاک کر دیے گئے۔ذرائع کا کہنا ہے کہ مارے گئے دہشت گردوں کے قبضے سے بھاری اسلحہ اور گولہ بارود بھی برآمد ہوا، جو اس گروہ کی سرگرمیوں کے حجم اور منصوبوں کی سنگینی کو ظاہر کرتا ہے۔ رپورٹ کے مطابق طارق کچھی گزشتہ دو برس سے دہشت گردانہ حملوں میں سرگرم تھا اور فتنۂ خوارج طالبان کے لیے بھتہ خوری، مالی معاونت اور افغانستان سے پاکستان میں دراندازی کے لیے سہولت کاری جیسے کام انجام دیتا رہا۔ فورسز کی اس بروقت کارروائی نے نہ صرف ایک متحرک دہشت گرد تشکیل کو توڑ دیا بلکہ مستقبل کی ممکنہ وارداتوں کا راستہ بھی مسدود کر دیا ہے۔