آسکر تقریب اب یو ٹیوب پر نشر ہوگی

ہالی ووڈ کے سب سے باوقار اور معتبر اعزاز، آسکر ، 2029 سے ایک نئے ڈیجیٹل دور میں داخل ہونے جا رہے ہیں، جہاں یہ تاریخی تقریب یوٹیوب پر براہِ راست نشر کی جائے گی۔ اکیڈمی آف موشن پکچر آرٹس اینڈ سائنسز اور یوٹیوب کے درمیان اس حوالے سے ایک اہم اسٹریٹجک شراکت داری طے پا گئی ہے، جس کا باقاعدہ آغاز 101ویں آسکر ایوارڈز سے ہوگا۔ اس فیصلے کو تفریحی دنیا میں ایک انقلابی قدم قرار دیا جا رہا ہے۔ اکیڈمی کے سی ای او بل کریمر اور صدر لینیٹ ہاؤل ٹیلر نے مشترکہ طور پر اعلان کیا کہ یہ معاہدہ 2033 تک مؤثر رہے گا، جو ہالی ووڈ کی تاریخ میں نشریاتی روایات کو یکسر بدل دینے والا موڑ ثابت ہو سکتا ہے۔ مشترکہ بیان میں کہا گیا کہ یوٹیوب کے ساتھ یہ ہمہ جہت عالمی شراکت داری آسکرز اور اکیڈمی کے سال بھر جاری رہنے والے پروگرامز کے لیے مستقبل کا مرکزی پلیٹ فارم ثابت ہوگی۔

اکیڈمی کا مزید کہنا تھا کہ ایک بین الاقوامی ادارے کے طور پر یہ معاہدہ دنیا بھر کے ناظرین تک اکیڈمی کے وژن، کام اور فلمی سرگرمیوں کو زیادہ مؤثر انداز میں پہنچانے میں مدد دے گا، جس سے فلم انڈسٹری اور اکیڈمی ممبران دونوں کو فائدہ پہنچے گا۔ یوٹیوب کے سی ای او نیل موہن نے اس موقع پر کہا کہ یہ شراکت داری نئی نسل کے فلمی شائقین کو آسکرز کے قریب لانے میں اہم کردار ادا کرے گی، جبکہ اس تاریخی تقریب کی روایات اور وقار کو بھی مکمل طور پر برقرار رکھا جائے گا۔ معاہدے کے تحت دنیا بھر کے ناظرین ریڈ کارپٹ کی چکاچوند سے لے کر ایوارڈ تقریب، فاتحین کے جذباتی لمحات اور پس پردہ مناظر تک، مکمل آسکر تجربہ یوٹیوب پر براہِ راست دیکھ سکیں گے، یوں آسکرز پہلی بار ہر اسکرین تک پہنچ جائیں گے۔