نیویارک : پاکستانی نژاد امریکی کمیونٹی کے ساتھ میئر ایرک ایڈمز کی ملاقات

نیویارک سٹی کے میئر ایرک ایڈمز نے پاکستانی نژاد امریکی برادری کے ساتھ یکجہتی کا مظاہرہ کرتے ہوئے سٹی ہال میں ایک اہم اجلاس کی صدارت کی۔ یہ اپنی نوعیت کا سب سے بڑا اجلاس تھا، جس میں پاکستانی نژاد امریکی کمیونٹی کے سرکردہ رہنماؤں، افسران اور حکومتی محکموں کے اعلیٰ عہدیداران نے شرکت کی۔

اس خصوصی ملاقات میں نمایاں شرکاء میں شامل تھے:
آسیہ بادی، ایگزیکٹو ڈائریکٹر NYC چلڈرنز کابینہ،
آصف رحمان، کمشنر اور چیف ایڈمنسٹریٹو لا جج (OATH)،
جبکہ NYPD کے سینئر افسران انسپکٹر عدیل رانا، ڈپٹی انسپکٹر جہانگیر اشرف، وحید اختر اور مصباح نور بھی اجلاس میں موجود تھے۔

ملاقات میں نیویارک شہر کے اہم محکموں کے اعلیٰ حکام نے شرکت کی جن میں محکمہ مالیات، محکمہ صفائی، محکمہ صحت و ذہنی حفظان صحت، ٹیکسی اینڈ لیموزین کمیشن، چھوٹے کاروباری ادارے، اقلیتی و خواتین کے زیر ملکیت کاروباری پروگرام، اور مہاجرین کے امور کا میئر آفس شامل تھے۔

"پاکستانی برادری نیویارک کا فخر ہے”  میئر ایڈمز

میئر ایرک ایڈمز نے اجلاس سے خطاب کرتے ہوئے پاکستانی کمیونٹی کے کردار کو سراہا اور کہا:
"پاکستانی نژاد امریکی نیویارک کی ترقی اور ثقافت کا لازمی جز ہیں۔ میری انتظامیہ وعدے نہیں کرتی، عملی اقدامات پر یقین رکھتی ہے۔”

انہوں نے اپنی انتظامیہ کے دوران کمیونٹی کے لیے کیے گئے اقدامات کا ذکر کرتے ہوئے بتایا کہ:

• مین ہیٹن میں پہلی مرتبہ پاکستانی پرچم لہرایا گیا

• پبلک اسکولوں میں حلال کھانوں کی فراہمی ممکن بنائی گئی

• سرکاری دفاتر میں نماز کی ادائیگی کے لیے مخصوص جگہیں مختص کی گئیں

• پاکستانی نژاد افراد کو اہم سرکاری عہدوں پر تعینات کیا گیا

• مساجد کو اذان لاوڈ اسپیکر پر دینے کی باقاعدہ اجازت دی گئی

کمیونٹی کے مسائل اور تجاویز پیش

اجلاس کے دوران کمیونٹی رہنماؤں نے اہم نکات پر روشنی ڈالی جن میں اسلاموفوبیا اور نفرت پر مبنی جرائم کی رپورٹنگ میں کمی، حلال خوراک کی رسائی، رمضان و عید جیسے تہواروں کی سرکاری سطح پر شناخت، ترجمہ سہولیات کی فراہمی، گرانٹس و حکومتی معاہدوں میں رہنمائی، اور حلال فوڈ پینٹریز کی توسیع شامل تھے۔

میئر کی عملی یقین دہانی

میئر ایڈمز نے فوری اقدامات کا اعلان کرتے ہوئے کہا کہ ان معاملات کو ترجیحی بنیادوں پر حل کیا جائے گا۔ انہوں نے درج ذیل اقدامات کی یقین دہانی کروائی:

• اسلاموفوبیا اور نفرت انگیز جرائم کے خلاف مؤثر حکمتِ عملی

• امیگریشن اور قانونی امور سے متعلق رہنمائی کی فراہمی

• DOHMH کے تعاون سے حلال کھانے کی فراہمی میں توسیع

• کمیونٹی کی رہنمائی کے لیے معلوماتی میلوں (Resource Fairs) کا انعقاد

اجلاس کی نظامت اور اختتام

اس اجلاس کی میزبانی عطیہ شہناز نے کی، جو میئر آفس میں مسلم خواتین کی رابطہ کار ہیں۔ انہوں نے پاکستانی کمیونٹی کے لیے کیے گئے اقدامات پر ایک تفصیلی چارٹ پیش کیا۔