پاکستانی قونصل جنرل کی نیویارک میئر کی اے اے پی آئی ہیریٹیج تقریب میں شرکت

نیویارک میں پاکستان کے قونصل جنرل عامر احمد اتوزئی نے ایشین امریکن اینڈ پیسفک آئی لینڈر (AAPI) ہیریٹیج ماہ کی مناسبت سے نیویارک سٹی کے میئر آفس کی جانب سے منعقدہ ایک خصوصی استقبالیہ میں شرکت کی۔ اس تقریب کا مقصد  امریکہ اور خاص طور پر نیویارک سٹی میں AAPI کمیونٹیز کی تنوع، حوصلہ اور خدمات کو سراہنا تھا۔

اپنے کلیدی خطاب میں میئر ایرک ایڈمز نے AAPI کمیونٹیز کی محنت، عزم اور ترقی میں کردار کو سراہا۔ انہوں نے ان کمیونٹیز کی امریکہ میں اپنے خوابوں کی تعبیر کے لیے جدوجہد اور نیویارک سٹی کی سماجی، ثقافتی اور معاشی ترقی میں ان کے مؤثر  کردار کو خراج تحسین پیش کیا۔

اس تقریب میں پاکستانی نژاد امریکیوں کی بڑی تعداد میں شرکت دیکھنے میں آئی، جو اس بات کا مظہر ہے کہ یہ کمیونٹی شہری و ثقافتی سرگرمیوں میں بھرپور کردار ادا کر رہی ہے۔ شرکاء نے میئر کی شمولیتی پالیسیوں اور پاکستانی کمیونٹی کے کردار کو سراہنے پر ان کا شکریہ ادا کیا۔