نیشنل اسٹیڈیم کراچی کی بڑی اپ گریڈیشن کا منصوبہ

پاکستان کرکٹ بورڈ نے نیشنل اسٹیڈیم کراچی کی مکمل ازسرنو تزئین و آرائش کا ارادہ کرلیا ۔ ذرائع کے مطابق آئندہ ماہ سے تعمیراتی کام کا باقاعدہ آغاز ہوگا، جس کے دوران تمام پرانے اسٹینڈز کو ہٹا کر نئے ماڈرن ڈیزائن کے مطابق تعمیر کیا جائے گا۔ اسٹینڈز کے باہر موجود جنگلے بھی ختم کیے جائیں گے تاکہ شائقین کے لیے بہترین نظارہ ممکن بنایا جا سکے۔ذرائع کا کہنا ہے کہ کراچی کے نیشنل اسٹیڈیم کے نئے انکلوژرز کا ڈیزائن قذافی اسٹیڈیم لاہور سے مشابہہ ہوگا، تاہم قذافی اسٹیڈیم میں اسٹینڈز پر چھتیں بعد میں نصب کی جائیں گی۔اسی سلسلے میں پی سی بی، سی ڈی اے کے تعاون سے اسلام آباد میں بھی نیا اسٹیڈیم تعمیر کر رہا ہے۔

اسلام آباد کے نئے اسٹیڈیم کا انتظامی کنٹرول سی ڈی اے کے پاس ہوگا، جبکہ پی سی بی کو یہاں بین الاقوامی اور ملکی سطح کے میچز کے انعقاد کی اجازت دی جائے گی۔پی سی بی نے لاہور، کراچی اور راولپنڈی میں اسٹیڈیم اپگریڈیشن کے لیے کل 18 ارب روپے مختص کیے ہیں، جن میں سے پہلے مرحلے میں تقریباً 10.5 ارب روپے تعمیراتی کاموں پر خرچ ہو چکے ہیں۔واضح رہے کہ رواں سال منعقدہ آئی سی سی چیمپئنز ٹرافی کے دوران نیشنل اسٹیڈیم کی پہلے ہی جزوی تزئین و آرائش کی گئی تھی، جس کا افتتاح وزیراعلیٰ سندھ مراد علی شاہ نے کیا تھا۔اس وقت کی تزئین و آرائش میں جدید معیار کے ڈریسنگ رومز، ہاسپٹیلٹی باکسز، 350 ایل ای ڈی لائٹس، 2 ڈیجیٹل ری پلے اسکرینز اور 5 ہزار نئی کرسیوں کا اضافہ شامل تھا، جس نے نہ صرف کھلاڑیوں بلکہ شائقین اور نشریاتی ٹیم کے تجربے کو بھی بہتر بنایا۔

اب نیشنل اسٹیڈیم کراچی کی مکمل اپگریڈیشن سے پاکستان کے سب سے بڑے شہر میں کرکٹ کے عالمی معیار کے مطابق جدید اسٹیڈیم کی تعمیر ممکن ہو جائے گی، جو شائقین اور کھلاڑیوں دونوں کے لیے ایک یادگار تجربہ ثابت ہوگی۔