امریکا کی کل سے 25 فیصد اضافی ٹیرف کے نفاذ کی تصدیق، بھارتی اسٹاک مارکیٹ کو جھٹکا

امریکی محکمہ ہوم لینڈ سیکیورٹی کی جانب سے بھارت سے آنے والی تمام مصنوعات پر مزید 25 فیصد محصول عائد کرنے کی تصدیق نے بھارتی حصص بازار کو جھنجھوڑ کر رکھ دیا۔ منگل کی ابتدائی کاروباری گھنٹوں میں ہی مارکیٹ زمین بوس ہوئی اور اگست میں حاصل ہونے والے تمام منافع پلک جھپکتے میں مٹ گئے۔ رائٹرز کے مطابق نِفٹی 50 اور بی ایس ای سنسیکس صبح 10 بج کر 39 منٹ (پاکستانی وقت کے مطابق 10 بج کر 9 منٹ) تک 7 فیصد کمی کے ساتھ بالترتیب 24,787 اور 81,028 پوائنٹس پر ٹریڈ کر رہے تھے۔ یہ وہی اشاریے ہیں جو پورے مہینے نسبتاً مستحکم رہے تھے، مگر ایک ہی دن میں شدید مندی نے سرمایہ کاروں کو ہلا کر رکھ دیا۔ بھارت کے 16 بڑے شعبوں میں سے 15 مندی کی لپیٹ میں آگئے، یہاں تک کہ درمیانے اور چھوٹے درجے کے حصص بھی تقریباً 1 فیصد گر گئے۔ امریکی ڈیوٹیز اب 50 فیصد تک جا پہنچی ہیں، جو واشنگٹن کی جانب سے عائد کردہ سب سے بھاری محصولات میں شمار ہوں گی۔

یہ اقدام صدر ڈونلڈ ٹرمپ کی طرف سے نئی دہلی کی روسی تیل کی خریداری میں اضافے پر سخت جواب کے طور پر سامنے آیا۔ آئی سی آئی سی آئی سیکیورٹیز کے ریٹیل ریسرچ کے سربراہ پانکج پانڈے کے مطابق اگرچہ یہ خبر مارکیٹ کے لیے منفی ہے، لیکن سرمایہ کاروں کو بڑی گراوٹ کی توقع نہیں رکھنی چاہیے کیونکہ یہ اقدام کسی حد تک متوقع تھا۔ مارکیٹ کے بڑے کھلاڑی بھی اس دباؤ سے نہ بچ سکے۔ نِفٹی 50 میں سب سے زیادہ وزن رکھنے والا ریلائنس انڈسٹریز 1 فیصد نیچے آگیا، بڑے مالیاتی اداروں کے حصص 1.1 فیصد اور فارما کمپنیوں کے حصص 1.4 فیصد تک گر گئے۔ اسی طرح ٹیکسٹائل، کیمیکلز اور جھینگا برآمد کرنے والی کمپنیوں کے حصص کو بھی شدید دھچکا لگا، کیونکہ امریکی محصولات کا سب سے زیادہ اثر انہی شعبوں پر پڑنے کا اندیشہ ہے۔ تاہم صارفین سے متعلق شعبے نے منفی رجحان کے باوجود ہلکی سی مزاحمت دکھائی اور 0.3 فیصد اضافہ ریکارڈ کر کے 16 میں سے واحد مثبت کارکردگی دکھانے والا شعبہ بن گیا۔دوسری طرف ٹیلی کام آپریٹر ووڈافون آئیڈیا کے حصص 10 فیصد گر گئے، کیونکہ رپورٹس میں انکشاف ہوا کہ حکومت واجبات پر مزید ریلیف دینے پر غور نہیں کر رہی۔ پانڈے کے مطابق آئندہ دنوں میں مارکیٹ کا رجحان مخصوص شعبوں پر مرکوز ہوگا۔ برآمدات پر انحصار کرنے والی کمپنیوں کے حصص دباؤ میں رہیں گے، جبکہ گھریلو معیشت سے جڑے شعبے کھپت کے بل بوتے پر کچھ بہتر کارکردگی دکھا سکتے ہیں۔