وفاقی وزیر داخلہ محسن نقوی نے وفاقی تحقیقاتی ادارے (FIA) کراچی زون کے دورے کے دوران جرائم پیشہ عناصر کے خلاف ایک جامع اور بےرحم کریک ڈاؤن کا حکم دے دیا۔
کراچی میں ایف آئی اے زون کے اجلاس سے خطاب کرتے ہوئے انہوں نے واضح الفاظ میں کہا:
"حوالہ ہنڈی مافیا میں ملوث بڑے ناموں کو بخشا نہ جائے، کوئی دباؤ قبول نہیں کیا جائے گا۔”
محسن نقوی نے ہدایت کی کہ حوالہ ہنڈی جیسے غیر قانونی ذرائع سے معیشت کو نقصان پہنچانے والوں کے خلاف سخت ترین اقدامات کیے جائیں، اور ان بڑے عناصر کو قانون کے کٹہرے میں لایا جائے جو اب تک قانون کی گرفت سے بچے ہوئے ہیں۔ وزیر داخلہ نے بھکاریوں کو بیرون ملک بھیجنے والے ایجنٹ نیٹ ورکس کو پاکستان کے امیج کو خراب کرنے کا ذمہ دار قرار دیا اور ان کی فوری گرفتاری کی ہدایت کی۔
انہوں نے کہا:
"ایجنٹس کے خلاف ایکشن نظر آنا چاہیے، مفرور عناصر کو دیگر صوبوں کے تعاون سے گرفتار کیا جائے۔”
مزید ہدایت دی گئی کہ بیرون ملک سے ڈی پورٹ ہو کر آنے والے بھکاریوں کو فوری طور پر گرفتار کیا جائے تاکہ اس مکروہ دھندے کا خاتمہ ممکن ہو۔ محسن نقوی نے جعلی اور مضر صحت ادویات کے کاروبار کو "ناقابلِ برداشت جرم” قرار دیتے ہوئے سخت لب و لہجے میں کہا:
"جعلی دوا فروخت کرنے والوں کی اصل جگہ جیل ہے، ان کے خلاف آہنی ہاتھوں سے نمٹا جائے۔”
وزیر داخلہ نے نان کسٹم پیڈ مصنوعات اور غیر قانونی طریقے سے بیرون ملک 5 ہزار ڈالر سے زائد رقم لے جانے والے مسافروں کے خلاف بھی قانون کے مطابق سخت کارروائی کا حکم دیا۔ انہوں نے واضح کیا کہ اسمگلنگ اور غیر قانونی ترسیلات روکنے کے لیے کسی قسم کی نرمی نہیں برتی جائے گی۔ اس موقع پر ڈائریکٹر ایف آئی اے کراچی زون، نعمان صدیق نے محسن نقوی کو ایف آئی اے کی موجودہ کارکردگی، درپیش چیلنجز اور مستقبل کی حکمت عملی سے آگاہ کیا۔
Discussion about this post