ہر ضلع میں فالج کے مریضوں کے لیے جدید اسٹروک سینٹرز قائم کرنے کا اعلان

وزیراعلیٰ پنجاب مریم نواز نے صوبے کے ہر ضلع اور تحصیل تک فالج کے مریضوں کے لیے جدید اسٹروک سینٹرز قائم کرنے کا بڑا اعلان کر دیا۔ ان کی زیر صدارت اجلاس میں صوبے بھر میں اسٹروک مینجمنٹ سینٹرز کے قیام کی منظوری دی گئی اور فالج کی بروقت تشخیص اور مؤثر علاج کے لیے جامع حکمت عملی پر تفصیلی غور کیا گیا۔ وزیراعلیٰ مریم نواز نے فالج کے علاج میں استعمال ہونے والے جدید ٹی پی اے اور ٹی این انجکشن کی خریداری کی منظوری دیتے ہوئے ہدایت کی کہ وسط فروری تک انجکشن کی دستیابی اور طبی عملے کی مکمل تربیت یقینی بنائی جائے۔ اس کے ساتھ فزیشنز کو بھی انجکشن لگانے کی باقاعدہ تربیت دی جائے گی تاکہ ہر مریض کو فوری اور مؤثر علاج فراہم کیا جا سکے۔ اجلاس کو بریفنگ میں بتایا گیا کہ پنجاب انسٹیٹیوٹ آف کارڈیالوجی میں اسٹروک مینجمنٹ پروگرام کی عارضی سہولت فراہم کی جائے گی جبکہ صوبے میں مرحلہ وار اسٹروک سینٹرز قائم کیے جائیں گے۔ پہلے مرحلے میں 30، دوسرے مرحلے میں 15 اور تیسرے مرحلے میں باقی 24 اضلاع میں جدید سینٹرز فعال ہوں گے۔ وزیراعلیٰ نے واضح کیا کہ ہر ضلع میں اسٹروک سینٹرز قائم کیے جا رہے ہیں اور ان کا دائرہ کار تحصیل کی سطح تک بڑھایا جائے گا تاکہ کسی بھی مریض کو ایمرجنسی کی صورت میں دور دراز شہر جانے کی ضرورت نہ پڑے۔

انہوں نے عوام کو فالج کی ابتدائی علامات اور چار گھنٹے کے “گولڈن آور” کی اہمیت سے آگاہ کرنے کی ضرورت پر زور دیا، کیونکہ بروقت علاج سے مریض کو مستقل معذوری سے بچایا جا سکتا ہے۔وزیراعلیٰ مریم نواز نے مزید ہدایت کی کہ ہر اسپتال میں سی ٹی سکین مشین ہمیشہ فعال رہنی چاہیے اور ہر ڈسٹرکٹ اسپتال میں ماہر نیورالوجسٹ اور پیڈز نیورالوجسٹ تعینات کیے جائیں تاکہ فوری اور اعلیٰ معیار کی طبی سہولت فراہم کی جا سکے۔ ان کا کہنا تھا کہ حکومت پنجاب کا وژن یہ ہے کہ ہر مریض کو ایمرجنسی علاج اس کے قریبی اسپتال میں فراہم ہو تاکہ بروقت اور زندگی بچانے والا علاج ہر شہری تک پہنچ سکے۔