’شرمناک‘، ماورا حسین بالی وڈ اداکار ہرش وردھن پر برس پڑیں

پاکستانی اداکارہ ماورا حسین نے حالیہ کشیدہ حالات میں بھارتی اداکار ہرش وردھن رانے کی جانب سے دیے گئے متنازع بیان پر شدید ردِعمل دیتے ہوئے اسے شرمناک اور افسوسناک قرار دیا ہے۔ اپنی انسٹاگرام اسٹوری میں ماورا نے لکھا کہ جب دو ایٹمی طاقتیں جنگ کے دہانے پر ہوں، ایسے وقت میں فلمی اعلانات کرنا نہ صرف غیر ذمہ دارانہ ہے بلکہ انتہائی افسوسناک بھی ہے۔ ماورا نے واضح انداز میں ہرش وردھن کو مخاطب کرتے ہوئے کہا کہ آپ نے نو سال بعد محض سستی شہرت کے لیے میرے نام کو استعمال کیا۔ آپ اس عمل سے میری نظروں سے گر گئے ہیں۔

یاد رہے کہ 2016 میں ریلیز ہونے والی فلم صنم تیری قسم میں ماورا حسین اور ہرش وردھن نے مرکزی کردار نبھائے تھے۔ فلم ابتدائی طور پر باکس آفس پر کامیاب نہ ہو سکی، تاہم رواں سال 7 فروری کو دوبارہ ریلیز ہونے کے بعد فلم نے حیران کن کمائی کی، جس کے بعد اس کے سیکوئل کی خبریں گرم ہو گئیں۔ تاہم، حالیہ بھارت پاکستان کشیدگی کے دوران ہرش وردھن کی انسٹاگرام پوسٹ نے ایک نیا تنازع کھڑا کر دیا، جس میں انہوں نے عندیہ دیا کہ اگر فلم کا دوسرا حصہ بنایا گیا تو وہ پرانی کاسٹ کے ساتھ کام نہیں کریں گے۔ ماورا نے اس بیان کو "جنگ جیسے سنجیدہ وقت میں ذاتی مفاد کی تلاش” قرار دیتے ہوئے کہا کہ ،،میرے ملک کے بچوں نے جانیں دیں، افواج نے ردِعمل دیا، اور آپ ان حالات میں فلموں پر بات کر رہے ہیں؟ یہ سستی شہرت کی بدترین مثال ہے۔ ماورا حسین نے اپنی پوسٹ کے اختتام پر انتہائی جذباتی اور محبِ وطن الفاظ میں کہ میں اس وقت فلموں کا نہیں، دونوں ممالک کے معصوم شہریوں اور اپنی افواج کے لیے دعا کر رہی ہوں۔ میرا ملک ہر چیز سے بالاتر ہے پاکستان زندہ باد !