لندن میں پیش آئے واقعے پر ماہرہ خان بول پڑیں

پاکستانی فلم انڈسٹری کی معروف اداکارہ ماہرہ خان کو لندن میں اپنی نئی فلم "لو گرو” کی تشہیر کے دوران ایک ناخوشگوار واقعے کا سامنا کرنا پڑا، جس پر اب انہوں نے خاموشی توڑتے ہوئے اپنے جذبات کا اظہار کیا ہے۔ یہ واقعہ لندن کے الفورڈ کے ایک انڈو-پاک سپر مارکیٹ میں پیش آیا جہاں ماہرہ خان اور اداکار ہمایوں سعید مداحوں سے ملاقات اور فلم کی پروموشن کے لیے پہنچے تھے۔ میٹ اینڈ گریٹ سیشن کے دوران سیکیورٹی کے ناقص انتظامات اور غیر متوازن بھیڑ کے باعث حالات بگڑ گئے اور اداکارہ شدید پریشانی کا شکار ہو گئیں۔ سوشل میڈیا پر گردش کرتی ایک ویڈیو میں دیکھا گیا کہ ماہرہ خان ہجوم میں پھنس گئیں، اور ایک سیکیورٹی گارڈ کے غیر موزوں انداز سے قریب آنے پر وہ اضطراب کا شکار ہوئیں۔ صورتحال کو بگڑتا دیکھ کر اداکار ہمایوں سعید نے فوری طور پر مداخلت کرتے ہوئے ماہرہ کو حفاظت فراہم کی اور ہجوم کو پیچھے ہٹایا، جس پر مداحوں کی جانب سے ان کے اس بروقت اقدام کو خوب سراہا گیا۔

حالیہ دنوں میں ایک نجی ٹی وی چینل پر گفتگو کرتے ہوئے ماہرہ خان نے اس واقعے پر کھل کر بات کی۔ ان کا کہنا تھا: "میں عام طور پر خود کو سنبھال لیتی ہوں، لیکن اس لمحے میں بے حد پریشان تھی۔ ہمایوں ایک ایسے شخص ہیں جو مجھے بخوبی جانتے ہیں۔ جب میں خاموشی سے گھبرائی، تو انہوں نے فوراً میری کیفیت بھانپ لی اور آگے بڑھ کر میری مدد کی۔” ہمایوں سعید نے بھی اسی پروگرام میں گفتگو کرتے ہوئے کہا: "یہ صرف ماہرہ کی بات نہیں، میں ہر اُس عورت کی مدد کروں گا جو کسی بھی مشکل میں ہو۔ چاہے وہ میری ساتھی ہو یا کوئی اجنبی۔” اداکاروں کی اس گفتگو اور واقعے پر سوشل میڈیا صارفین نے ایک مرتبہ پھر ماہرہ خان کے وقار اور ہمایوں سعید کی بردباری کو سراہا ہے۔ تاہم کئی حلقوں نے ایونٹ انتظامیہ کو ناقص سیکیورٹی اور بدانتظامی پر سخت تنقید کا نشانہ بھی بنایا ہے۔